مغربی بنگال کے جنوبی 24 پرگنہ کے چمپاٹی علاقے میں واقع ایک پٹاخہ بنانے کے کارخانے میں بھیانک دھماکہ ہوا۔ دھماکے کے نتیجے میں لگی آگ کے سبب نصف درجن دکانوں اور کئی مکانات کو نقصان پہنچا ہے۔ وہیں اس واقعے کے بعد علاقے میں سنسنی پھیل گئی۔
فائر بریگیڈ عملے نے جائے وقوع پر پہنچ کر گھنٹوں کی مشقت کے بعد آگ پر قابو پا لیا۔ تاہم اس دوران لاکھوں کی املاک خاکستر ہو گئی۔
دمکل کے اہلکار کا کہنا ہے کہ پٹاخہ بنانے کے کارخانے میں دھماکے بعد آگ لگ گئی، اور آگ کی زد میں آنے کے سبب آس پاس کی کئی دکانوں اور گھروں کو کافی نقصان پہنچا ہے۔
انہوں نے مزید کہا کہ کارخانے کے مالک کے خلاف لاپرواہی برتنے کی شکایت درج کرائی گئی ہے۔
واقعے کی اطلاع کے بعد پولیس کے اعلیٰ افسران نے جائے وقوع پر پہنچ کر حالات کا جائزہ لیا۔
ایس ڈی پی او کا کہنا ہے کہ اس معاملے میں تفتیش جاری ہے اور کارخانے کے مالک کے خلاف شکایت درج کی گئی ہے۔ انہوں نے کہا کہ اس واقعے میں کسی کے زخمی یا فوت ہونے کی کوئی اطلاع نہیں ہے، لیکن کافی مالی نقصان ہوا ہے۔
