کولکاتا کے ریڈ روڈ میں ہر سال یوم آزادی کے موقع پر مختلف طرح کے ثقافتی پروگرام پیش کیے جاتے ہیں۔ جس سے محظوظ ہونے کے لیے دور دراز سے عام لوگ آتے ہیں۔ ہر سال ہزاروں کی تعداد میں لوگ یوم آزادی کا جشن منانے کے لیے ریڈ روڈ پہنچتے ہیں لیکن اس بار کورونا وائرس کی وجہ سے تقریب میں عام لوگوں کو آنے کی اجازت نہیں دی گئی ہے۔
کورونا وائرس کے معاملات میں تیزی سے اضافہ ہو رہا ہے۔ جسے دیکھتے ہوئے یہ فیصلہ کیا گیا ہے۔ اس بار عام لوگوں کی عدم موجودگی کے درمیان ریڈ روڈ میں یوم آزادی کے جشن کی تقریبات کا انعقاد کیا جائے گا۔
ذرائع کے مطابق اس بار ریاستی وزیروں، عملہ اور پولس اہلکار ہی شرکت کر پائیں گے۔ سو سے زائد مہمان ہی موجود رہیں گے۔ ہر نشست کے درمیان کم سے کم 7 فٹ کا فاصلہ رہے گا۔ پرچم لہرانے کے علاوہ دوسری تقریبات کے اوقات میں کمی کی گئی ہے۔ نشست کی تعداد میں بھی کمی کی گئی ہے۔ 20 سے 25 منٹ میں ہی پروگرام ختم کر دیا جائے گا۔ لال بازار کے مطابق اس بار نرس، ڈاکٹر کے علاوہ کل 25 ، پولس اہلکاروں کو اعزاز سے نوازا جائے گا۔
