مغربی بنگال میں کورونا وائرس کی دوسری لہر تشویشناک شکل اختیار کر چکی ہے۔ حالات بد سے بتر ہوتے جا رہے ہیں۔ ریاست میں کورونا کے یومیہ 16 ہزار سے زائد نئے کیسز سامنے آرہے ہیں جبکہ روزانہ 70 سے زئاد افراد ہلاک ہورہے ہیں۔
دارالحکومت کولکاتا سے متصل ہوڑہ ضلع کے شالیمار میں کورونا سے ایک ڈاکٹر کی موت ہوگئی، جبکہ دو وکیلوں کی موت کے بعد وکلاء نے ہوڑہ عدالت میں دس دنوں تک کام بند کرنے کا اعلان کردیا۔
ہوڑہ کورٹ کریمینل بار ایسوسی ایشن کے صدر سمیر باسو رائے چودھری نے کہاکہ کورونا وائرس کے بڑھتے ہوئے کیسز کے مدنظر عدالت احاطے میں کام کرنا مشکل ہو گیا ہے'۔
انہوں نے کہاکہ ویسٹ بنگال بار کانسل سے رائے مشورے کے بعد ہوڑہ عدالت میں مکمل کام کاج بند کرنے کا فیصلہ کیا گیا ہے'۔
انہوں نے کہا کہ ضلع مجسٹریٹ کو اس سلسلے میں تحریری عرضداشت پیش کی گئی ہے۔ کیونکہ عدالت آنے والے لوگ کورونا گائیڈ لائن پر عمل نہیں کرتے ہیں جس سے حالات کے مزید بگڑنے کا خدشہ ہے۔
