بدھادیب بھٹاچاریہ کی حالت میں تیزی سے بہتری

کورونا وائرس سے متاثر ہونے والے سابق وزیراعلیٰ بدھادیب بھٹاچاریہ اور ان کی اہلیہ کی حالت میں تیزی سے بہتری آئی ہے۔

مغربی بنگال میں کورونا وائرس کی دوسری لہر خوفناک سے خوفناک تر ہوتی جا رہی ہے، جس کے سبب عام لوگ دہشت میں مبتلا ہو گئے ہیں۔ گزشتہ چند دنوں کے دوران مغربی بنگال میں کورونا وائرس کے نئے کیسز کے آنے کی رفتار میں تیزی سے اضافہ ہوا ہے لیکن تشفی بخش بات یہ ہے کہ ریاست میں کورونا وائرس نجات حاصل کرنے کی تعداد میں تیزی سے اضافہ ہوا ہے، جو ایک مثبت پہلو ہے۔

گزشتہ روز کورونا وائرس سے متاثر ہونے والے سابق وزیراعلیٰ بدھادیب بھٹاچاریہ اور ان کی اہلیہ کی حالت میں تیزی سے بہتری آئی ہے۔ ڈاکٹروں کا کہنا ہے کہ سابق وزیراعلیٰ بدھادیب بھٹاچاریہ کی حالت تشفی بخش ہے۔ انہیں جنرل وارڈ میں منتقل کیا گیا ہے۔

ڈاکٹروں کا مزید کہنا کہ سابق وزیراعلی کے ساتھ ساتھ ان کی اہلیہ کی حالت بھی مستحکم ہوئی ہے۔ آئندہ 48 گھنٹوں میں وہ (میرا بھٹاچاریہ ) پوری طرح سے صحتیاب ہو جائیں گی۔

واضح رہے کہ گزشتہ روز سابق وزیراعلیٰ بدھادیب بھٹاچاریہ اور ان کی اہلیہ میرا بھٹاچاریہ کو کورونا مثبت پائے جانے کے بعد ہسپتال میں داخل کرایا گیا تھا۔

غور طلب ہے کہ مغربی بنگال میں کورونا وائرس کے مریضوں کی کل تعداد گیارہ لاکھ کے قریب پہنچ چکی ہے جبکہ اس بیماری سے اب تک ساڑھے بارہ ہزار لوگوں کی موت ہوئی ہے۔