مغربی بنگال میں بلیک فنگس کی دستک، پانچ کیسز کی تصدیق

مغربی بنگال میں کورونا وائرس کے درمیان پانچ لوگوں میں بلیک فنگس کی علامت پائے جانے کے بعد محکمہ صحت حرکت میں آ گیا ہے۔

مغربی بنگال میں کورونا وائرس کی دوسری لہر سے نمٹنے میں ابھی کامیابی بھی نہیں ملی تھی کہ ایک اور مہلک مرض نے ریاست میں دستک دے دیا ہے، محکمہ صحت کے سامنے بلیک فنگس کے چیلنج درپیش ہے۔

ریاست میں کورونا وائرس کے درمیان بلیک فنگس کا خطرہ بھی تیزی سے بڑھنے لگا ہے، جس کے سبب عام لوگوں میں دہشت کا ماحول ہے۔

ذرائع کے مطابق کورونا وائرس کی وبا کے درمیان ریاست میں پانچ لوگوں میں بلیک فنگس کی علامت پائے جانے کی تصدیق ہوئی ہے۔ پانچ لوگوں میں بلیک فنگس کی تصدیق کے بعد ریاستی محکمہ صحت حرکت میں آ گئی ہے اور تمام اضلاع کے لیے الرٹ جاری کر دیا گیا ہے۔

مغربی بنگال محکمہ صحت کے مطابق ابھی تک ریاست میں پانچ لوگوں میں بلیک فنگس کی تصدیق ہوئی ہے۔ دارالحکومت کولکاتا اور اس کے اطراف کے اضلاع شمالی 24 پرگنہ اور جنوبی 24 پرگنہ کے لوگوں میں تشخیص ہوئی ہے۔ ان پانچ لوگوں کو ماہرین کی نگرانی میں رکھا گیا ہے۔

محکمہ صحت کے مطابق بلیک فنگس خطرناک ہے لیکن صحیح وقت پر اس کی نشاندہی کے بعد اس پر قابو پایا جا سکتا ہے۔ اس سے زیادہ پریشان ہونے کی ضرورت نہیں ہے۔

ریاستی محکمہ صحت کے مطابق بلیک فنگس کی کئی علامتیں ہیں۔ اس کی تصدیق بھی وقت پر ہوجاتی ہے۔ بس ضرورت اس بات کی ہے کہ اس کا صحیح طریقے سے علاج کیا جائے۔

انہوں نے کہا کہ محکمہ صحت کی جانب سے ریاست کے تمام اضلاع کو الرٹ جاری کر دیا گیا ہے اور اس بیماری کو لے کر بیداری مہم چلانے کی ہدایت دی گئی ہے۔