مغربی بنگال کے بدھان نگر جنوب تھانے میں ترنمول کانگریس کے رہنما و میونسپلٹی کے وارڈ کوڈینیٹر، برنا باتی بنرجی نے دلیپ گھوش کو اسمبلی انتخابات کے بعد ہوئے تشدد کا ذمہ دار قرار دیتے ہوئے ایف آئی آر درج کرائی۔
انہوں نے کہا کہ انتخابات کے نتائج کے بعد ریاست کے کچھ اضلاع میں تشدد پھوٹ پڑا جس میں 20 سے زائد افراد ہلاک ہوگئے۔ انہوںنے تشدد کے واقعات کےلیے بی جے پی کے ریاستی صدر ذمہ دار قرار دیا۔
ترنمول کانگریس کے رہنما کا کہنا ہے کہ رکن پارلیمان دلیپ گھوش نے انتخابی مہم کے دوران اور انتخابات کے بعد بھڑکانے والے بیانات دیئے ہیں جس کے بعد تشدد کے واقعات رونما ہوئے۔ انہوں نے دلیپ گھوش پر عام لوگوں کو گمراہ کرنے کا بھی الزام عائد کیا۔ انہوں نے بے بنیاد بیان بازی کو تشدد کی وجہ بتائی جس میں کئی بے گناہوں کی موت ہوگئی۔
واضح رہے کہ کچھ روز قبل دلیپ گھوش نے مدنی ہور ضلع کے کتوالی تھانے میں ترنمول کانگریس کی سربراہ اور وزیراعلیٰ ممتا بنرجی کے خلاف تین ایف آئی آر درج کرائی تھیں۔
