الیکشن کمیشن نے آج مغربی بنگال بی جے پی سربراہ دلیپ گھوش کو کوچ بہار فائرنگ پر اشتعال انگیز تبصرہ کرنے پر نوٹس جاری کرتے ہوئے بدھ کی صبح تک جواب دینے کی ہدایت دی ہے۔
الیکشن کمیشن کے نوٹس میں کہا گیا ہے کہ گھوش نے ایسے بیانات دیے ہیں جو اشتعال انگیز ہیں اور جذبات کو بھڑکانے والے ہیں۔ گھوش کا یہ بیان ضابطہ اخلاق کی متعدد شقوں اور عوامی نمائندگی ایکٹ 1951 اور تعزیراتی ضابطہ کی دفعات کی خلاف ورزی ہے۔
فائرنگ کے بعد گھوش نے کہا تھا کہ سیتل کوچی جیسے واقعات مزید کئی مقامات پر پیش آنا چاہیے۔ شمالی 24 پرگنہ ضلع کے باران نگر میں ایک انتخابی ریلی سے خطاب کرتے ہوئے گھوش نے کہا کہ ' کوچ بہار سیتل کوچی میں شرارتی لڑکوں کو گولیاں لگیں ہیں۔ اگر کوئی قانون کو اپنے ہاتھ میں لینے کی ہمت کرتا ہے تو اس کے ساتھ بھی یہی ہوگا'۔
انہوں نے مزید کہا کہ شرارتی لڑکوں نے یہ خیال کیا تھا کہ مرکزی افواج کی رائفلیں انتخابی ڈیوٹی کے دوران محض نمائش کے لیے ہیں، سیتل کوچی کی فائرنگ کے بعد اب وہ دوبارہ اس حرکت کوکرنے کی ہمت نہیں کریں گے'۔
خیال رہے کہ سنیچر کو چوتھے مرحلے کی پولنگ کے دوران سیتل کوچی کے ایک بوتھ پر فائرنگ کی وجہ سے چار افراد کی موت ہوگئی ہے۔ گرچہ الیکشن کمیشن نے اس پورے واقعے کو غلط فہمی سے تعبیر کررہا ہے۔ تاہم گاؤں والوں نے دعویٰ کیا ہے کہ یہ ایک منصوبے کے تحت انجام دیا گیا ہے۔ اتوار کے روز حکمران ترنمول کانگریس نے کوچ بہار کے سیتل کوچی میں چار افراد کی ہلاکت کے بارے میں گھوش کے بیانات کے اعتراض کرتے ہوئے کہا تھا کہ دلیپ گھوش کے بیان پر کارروائی ہونی چاہیے۔
ممتا بنرجی نے الزام عائد کیا ہے کہ یہ ایک منصوبے کے تحت انجام دیا گیا ہے اور اس کا مقصد ووٹروں کو خو ف زدہ کرنا ہے۔ دریں اثنا جاری انتخابات کے پانچویں اور چھٹے مرحلے بالترتیب 17 اپریل اور 22 اپریل کو ہوں گے۔ ووٹوں کی گنتی 2 مئی کو ہوگی۔
یواین آئی
