عالمی وبا کورونا وائرس کے سبب پورے ملک میں لاک ڈاؤن نافذ ہے، ایسے حالات میں خاص طور پر ایک ریاست سے دوسری ریاستوں میں جا کر مزدوری کرنے والے غریب مجبور مزدوروں کو کافی مشکلات کا سامنا ہے۔
ریاست مغربی بنگال کے ساہودنگی کے اینٹ بھٹہ پر کام کرنے والے مزدوروں سے بھری بس حادثے کا شکار ہو گئی۔ حادثے میں کم ازکم 32 مہاجر مزدور شدید زخمی ہوئے ہیں۔ ساہودنگی میں اینٹوں کے بھٹے پر کام کرنے والے یہ تمام مہاجر مزدور مغربی بنگال کے کوچ بیہر جارہے تھے۔
بس میں سوار جن افراد کو زیادہ چوٹیں آئیں ہیں ان میں تین بچے اور چار خواتین شامل ہیں۔ ان سبھی کو جلپائی گوڑی کے دھپگوری کے ایک اسپتال میں داخل کرایا گیا ہے۔
دھپگوری پولیس نے موقع پر پہنچ کرحادثے میں زخمی لوگوں کو باہر نکال کر انہیں ہسپتال بھیجنے کا کام شروع کر دیا ہے، بتایا جا رہا ہے کہ حادثے کے بعد سے بس ڈرائیور فرار ہے۔
آپ کو بتا دیں کہ کورونا وائرس کے خطرے کے سبب لاک ڈاؤن میں کہیں کام نہ ملنے کے سبب یہ مزدور اپنے اپنے گھروں کی جانب جیسے بن رہا کوچ کرنے پر مجبور ہیں۔ گذشتہ دنوں اترپردیش کہ اوریا علاقے میں بھی مزدوروں سے بھری ٹرک زبردست حادثے کا شکار ہوئی تھی جس میں کافی لوگوں کے زخمی اور 25 مزدور کے ہلاک ہونے کی خبر تھی۔
