بی جے پی ایک لاکھ حامیوں کے ساتھ لال بازار کا گھیراؤ کرے گی

کولکاتا میں جعلی کووڈ ویکسین معاملے کے خلاف بی جے پی کی جانب سے احتجاج کیا جا رہا ہے۔ بی جے پی کا کہنا ہے کہ اس میں ترنمول کانگریس کے رہنما بھی ملوث ہیں۔ بی جے پی کی طرف سے اس معاملے کی سی بی آئی سے جانچ کرانے کا مطالبہ کیا گیا ہے۔

بی جے پی کے حامیوں نے کولکاتا میں جعلی کووڈ ویکسین کے خلاف احتجاج کیا۔ بی جے پی کا کہنا ہے کہ وہ اس کے خلاف آئندہ ماہ ایک لاکھ حامیوں کے ساتھ پولیس ہیڈ کوارٹر لال بازار کا گھیراؤ کریں گے۔'

در اصل کولکاتا کے قصبہ علاقے میں ایک ویکسین کیمپ لگایا گیا تھا جس کے بارے میں دعویٰ کیا جارہا ہے کہ اس کیمپ میں جعلی کووڈ ویکسین دی گئی ہے۔ دیبانجن دیب نام کے ایک شخص نے خود آئی اے ایس افسر بتاکر ویکسین کیمپ لگایا تھا۔ اس معاملے کے سامنے آتے ہی بی جے پی نے ریاستی حکومت کے خلاف احتجاج شروع کر دیا ہے۔ بی جے پی کا کہنا ہے کہ اس معاملے میں ترنمول کانگریس کے رہنما بھی ملوث ہیں اور اس معاملے کی بی آئی جانچ ہونی چاہیے۔

کولکاتا میں آج بی جے پی رہنما شیانتن باسو اور اگنی مترا پال نے احتجاج بھی کیا لیکن پولس نے ان کو منتشر کر دیا جس پر شیانتن باسو نے کہاکہ اس معاملے کے خلاف احتجاج و مارچ کریں گے، دو ایک دن کے درمیان ہم اس کے لیے تاریخ طے کر لیں گے۔'

انہوں یہ بھی کہا کہ جب تک لاک ڈاؤن رہے گا ضمنی انتخابات نہیں ہوں گے۔ انہوں نے کہاکہ ہم اس کے خلاف احتجاج کرتے رہیں گے۔ اگر ہم کو روکنے کی کوشش کی گئی تو آئندہ ماہ ہم لوگ ایک لاکھ لوگوں کے ساتھ لال بازار کا گھیراؤ کریں گے۔ ہم دیکھیں گے کہ پولس ہمیں کیسے روکتی ہے۔'

انہوں نے کہاکہ جعلی ویکسین معاملے میں اگر کسی کی موت ہوجاتی تو ترنمول کانگریس مرکزی حکومت کو ذمہ دار ٹھہراتی ہے۔ اس میں ترنمول کانگریس کے رہنما ملوث ہیں۔ اس معاملے کی سی بی آئی جانچ کی جائے۔'