مغربی بنگال میں رواں برس ہونے والے اسمبلی انتخابات سے قبل بی جے پی کے اعلیٰ رہنماؤں کے ریاست کے دورے کا سلسلہ جاری ہے، گزشتہ دو مہینوں کے دوران وزیر داخلہ امت شاہ، بی جے پی کے قومی صدر جے پی نڈا سمیت پارٹی کے اعلیٰ رہنماؤں کے دورے کا سلسلہ جاری ہے۔
چند روز قبل بی جے پی کے قومی صدر جے پی نڈا نے مغربی بنگال کا دورہ کیا تھا، اس کے بعد وزیر داخلہ امت شاہ ایک بار پھر مغربی بنگال کے دورے پر آئیں گے، بی جے پی کے قومی نائب صدر مکل رائے نے کہا کہ وزارت داخلہ نے وزیر داخلہ امت شاہ کے دورے سے متعلق شیڈول کا اعلان کر دیا ہے۔
چند گھنٹوں قبل وزارت داخلہ کی جانب سے امت شاہ کے دورے سے متعلق پیغام پہلے بی جے پی کی مرکزی کمیٹی کو ملا، اس کے بعد ان کی جانب سے ای میل کے ذریعہ وزیر داخلہ امت شاہ کے تفصیلی شیڈول موصول ہوا۔
شیڈول کے مطابق بی جے پی کے رہنما اور وزیر داخلہ امت شاہ 30 جنوری کو مغربی بنگال کے دورے پر آئیں گے، اس مرتبہ شمالی 24 پرگنہ دورے کا مرکزی مقام ہوگا، وزیر داخلہ امت شاہ اپنے دورے کے دوران شمالی24پرگنہ کے بنگاوں کے ٹھاکر نگر میں متوا سماج کے جلسے کو خطاب بھی کریں گے۔
وزیر داخلہ امت شاہ کی بی جے پی کے رکن پارلیمان شانتانو ٹھاکر کے ساتھ ملاقات ہوگی جہاں مغربی بنگال میں شہریت ترمیمی ایکٹ اور این آر سی نافذ کرنے کو لے کر تبادلہ خیال ہونے کا امکان ہے۔
