گزشتہ بیس دنوں سے کانٹریکٹ اساتذہ کے ہڑتال سے جہاں ایک طرف بچوں کی تعلیم کا شدید نقصان ہو رہا ہے وہیں دوسری جانب احتجاجی مظاہرہ کرنے والی تنظیموں کے سربراہان بھی اپنے مطالبات پر بضد ہیں۔
ان کا کہنا ہے کہ جب تک حکومت ہمارے مطالبات تسلیم نہیں کرتے اس وقت تک ہم لوگ سڑکوں پر اتر کر آئینی طریقے سے اپنے حق کی آواز بلند کرتے رہیں گے، پورے بہار میں چار لاکھ کانٹریکٹ اساتذہ کے سڑکوں پر آنے سے تعلیمی نظام متاثر ہوا ہے۔
اسی ضمن میں سڑکوں پر اتر کر احتجاجی مظاہرہ کرنے والے اساتذہ کی ہمت اور حوصلہ بڑھانے کے لیے ٹی ای ٹی اساتذہ یونین کے ریاستی کنوینر راجو سنگھ نے آج ارریہ پہنچ کر احتجاج کر رہے اساتذہ سے ملاقات کرکے ان کی حمایت میں آواز بلند کی۔
اس دوران راجو سنگھ نے ای ٹی وی بھارت سے خصوصی بات چیت کی اور اساتذہ کے موجودہ مسائل پر تفصیلی روشنی ڈالی ساتھ ہی حکومت کی نیت پر کئی سوال اٹھائے۔
راجو سنگھ نے کہا کہ یہ حکومت تانا شاہ ہو گئی ہے اور بچوں کے تعلیمی نقصان کی ذمہ دار صرف نتیش حکومت ہے۔
انھوں نے کہا کہ ہم نے قبل از وقت ہی مطلع کیا تھا کہ حکومت ہمارے مطالبات پر توجہ دے مگر اسے سنجیدگی سے غور نہیں کیا گیا، اب ہم خاموش نہیں بیٹھیں گے، ایک عرصے سے ہم اپنی لڑائی لڑ رہے ہیں مگر حکومت ہمیشہ ہم لوگوں کو ٹھگنے کا کام کر رہی ہے۔
انھوں نے مزید کہا کہ ہمارے اساتذہ پر فرضی مقدمہ درج کرکے انہیں پریشان کرنے کی کوشش کی جا رہی ہے، تنظیم ایسے اساتذہ کے ساتھ پوری مضبوطی کے ساتھ کھڑی ہے اور قانونی لڑائی لڑے گی، مگر ہم کسی بھی صورت میں جھکینگے نہیں۔
