ارریہ کالج: شعبہ آرٹس میں داخلہ نہ ملنے پر طلبہ کا احتجاج

نئے سیشن کے تحت ارریہ کالج میں داخلے کا عمل جاری ہے، طلبہ جوق در جوق داخلہ کے لئے کالج پہنچ رہے ہیں، مگر طلبہ کی ایک بڑی جماعت ارریہ کالج احاطہ میں ارریہ کالج و پورنیہ یونیورسٹی انتظامیہ کے خلاف احتجاج و مظاہرہ کر رہے ہیں۔

ریاست بہار کے ضلع ارریہ میں واقع ارریہ کالج میں نئے سیشن کے تحت داخلے کا سلسلہ جاری ہے، مگر طلبہ کی ایک بڑی جماعت ارریہ کالج احاطہ میں انتظامیہ کے خلاف احتجاجی مظاہرہ کر رہی ہے۔ احتجاج کر رہے طلبا کو کالج کے پرنسپل پروفیسر عبد الرؤف نے بلا کر ملاقات کی اور مسائل سے واقفیت کے بعد ان مسائل کے حل کرائے جانے کی یقین دہانی کرائی۔

ارریہ کالج یونین کے کارکن مہتشم اختر نے اس بابت بتایا کہ' جدید داخلہ کے مطابق یہاں صرف سائنس اور کامرس کے طلبہ کا ہی داخلہ لیا جا رہا ہے، جبکہ آرٹس کے طلبہ کا داخلہ نہیں ہو رہا ہے، کالج انتظامیہ سے پوچھے جانے پر بتایا گیا کہ آرٹس شعبہ میں داخلہ کے لئے ابھی ہمارے پاس کوئی نوٹیفیکیشن نہیں آیا ہے جبکہ کئی طلبہ کا آن لائن فارم کے داخلہ کی منظوری ملی ہے۔ اگر ان طلبہ کا داخلہ نہیں لیا جائے گا تو پھر طلباء داخلہ کے لئے کہاں جائیں گے۔

مہتشم اختر نے کہا کہ' طالبات بڑی مشکل سے داخلہ کے لئے دور دراز سے آتی ہیں مگر انہیں خالی ہاتھ لوٹنا پڑ رہا ہے، پورنیہ یونیورسٹی کے وائس چانسلر سے ہمارا مطالبہ ہے کہ وہ اس معاملے کو سنجیدگی سے لیں تاکہ کسی طالب علم کا مستقبل خراب نہ ہو۔

مہتشم اختر نے مزید بتایا کہ' اس ضمن میں کالج کے پرنسپل سے ہماری ملاقات اور بات ہوئی ہے، انہوں نے کہا کہ' داخلہ کا اختیار ہم سے چھین لیا گیا ہے، جو گائیڈ یونیورسٹی سے ہمیں ملتا ہے اسی پر عمل درآمد ہوتے ہیں، انہوں نے یقین دہانی کرائی ہے کہ وہ اس معاملے پر یونیورسٹی کے وائس چانسلر سے خصوصی سے بات کریں گے، جیسے ہی ہمیں داخلہ کا نوٹیفکیشن موصول ہوگا ہم فوری طور سے طلباء کے لئے داخلے کا نوٹس جاری کریں گے۔