نئے زرعی قوانین کے خلاف اکھل بھارتی کسان سنگھرش سمیتی کا احتجاج

ارریہ میں اکھل بھارتی کسان سنگھرش سمیتی کے زیر اہتمام شہر کے بس اسٹینڈ پر احتجاجی مظاہرہ کیا گیا اور حکومت سے نئے زرعی قوانین کو واپس لینے کا مطالبہ کیا۔

دہلی، پنجاب اور ہریانہ میں نئے زرعی قوانین کے خلاف مسلسل احتجاج و مظاہرہ ہو رہا ہے۔ دہلی کی سرحدوں پر کسان کثیر تعداد میں زرعی قوانین کو واپس لئے جانے کے مطالبات کے ساتھ دھرنے پر بیٹھے ہیں۔

احتجاج و مظاہرہ کا سلسلہ اب آہستہ آہستہ پورے ملک میں پھیل رہا ہے۔ اسی ضمن میں آج ارریہ میں بھی اکھل بھارتی کسان سنگھرش سمیتی کے زیر اہتمام شہر کے بس اسٹینڈ پر احتجاجی مظاہرہ کیا گیا اور نئے زرعی قوانین کو واپس لئے جانے کا مطالبہ کیا۔

اس موقع پر بھارتی کمیونسٹ پارٹی کے ضلع سربراہ ڈاکٹر ایس آر جھا نے کہا کہ 'ملک کے لاکھوں کسان گذشتہ دو ماہ سے دہلی کی سرحدوں پر اس ٹھٹھرتی ٹھنڈ میں رات گزارنے پر مجبور ہیں۔ مگر یہ مودی حکومت اقتدار کے نشے میں اس قدر چور ہے کہ انہیں ان کی تکالیف کا اندازہ بھی نہیں ہے۔ جس طرح حکومت نے بغیر صلاح و مشورہ کے لاک ڈاؤن لگایا تھا، اسی طرح زرعی قوانین کو بھی بنایا ہے۔ ہمارا مطالبہ ہے کہ حکومت ہر حال میں اسے منسوخ کرے، مگر حکومت اپنی ضد پر اڑی ہے۔

سماجی کارکن آشیش رنجن نے کہا کہ' ملک میں ہزاروں کسان ہر سال خودکشی کرنے پر مجبور ہوتے ہیں۔ کیونکہ ان کی فصل برباد ہو جاتی ہے یا ان کو مناسب قیمت نہیں ملتی جس سے وہ قرضوں میں پھنستے چلے جاتے ہیں۔ کسانوں کا یہی مطالبہ ہے کہ انہیں ان کی فصل کی مناسب قیمت ملے۔ حکومت چاہتی ہے کہ کسان پوری طرح سے سرمایہ داروں پر منحصر ہو جائیں۔ پھر وہ انہیں جس طرح چاہیں نچائیں، ہم ایسا ہرگز نہیں ہونے دیں گے۔ آج کسان ہے تو یہ ملک ہے۔ جب کسان ہی خوشحال نہیں رہے گا تو ملک کیسے خوشحال ہوگا۔اس موقع پر سمیتی کی جانب سے نکر ناٹک کا بھی اہتمام کیا گیا۔