کانپور کے چمن گنج علاقہ میں واقع محمد علی پارک میں گذشتہ سات تاریخ سے شہریت ترمیمی قانون، این آر سی اور این پی آر کے خلاف مسلسل احتجاج جاری ہے۔
یہ احتجاج بھی دہلی کے شاہین باغ کی طرز پر لوک تنتر بچاؤ آندولن کے زیرقیادت چل رہا تھا، لیکن لوک تنتر بچاؤ آندولن کے ذمہ داران نے کچھ وقت کے لیے ملتوی کرنے کی خواہش ظاہر کی۔ جیسے ہی اس بات کا پتہ چلا تبھی احتجاج میں موجود خواتین اٹھ کھڑی ہوئیں اور کہا کہ احتجاج کا تسلسل نہیں ٹوٹے گا اب اس کی قیادت ہم خواتین کریں گے۔
مزید پڑھیں: طالبات نے سی اے اے کو بتایا کالا قانون
اس کے بعد سے خواتین نے عوام میں اعلان کر دیا کہ اب ہم لوگ اس احتجاج کو جاری رکھیں گے اس اعلان کا اثر یہ ہوا کہ یومیہ جمع ہونے والی خواتین کی تعداد جتنی ہوتی تھی اس سے کئی گنا زیادہ تعداد خواتین کی اس احتجاج میں بڑھ گئی۔
خواتین معمول کی طرح احتجاج میں بیٹھی رہیں اور عوام کو الگ الگ طرح سے سمجھاتی رہیں، شہریت ترمیمی قانون، این آر سی اور این پی آر پر حکومت کا موقف صاف واضح نہ ہونے پر خواتین مسلسل اس پر تنقید کرتی رہیں اور قانون کے خلاف نعرہ بازی کرتی رہیں۔
ایک خاتون نے میڈیا سے بات چیت کے دوران بتایا کہ 'ہمارا احتجاج حکومت کے خلاف نہیں ہے، بلکہ حکومت کے بنائے ہوئے 'شہریت ترمیمی قانون' کے خلاف ہے۔ یہ قانون مذہب کی بنیاد پر بانٹنے والا ہے۔ لہٰذا ہمارا احتجاج تب تک جاری رہے گا جب تک حکومت اس کو واپس نہیں لیتی'۔
وہیں ایک اور خاتون نے بتایا کہ 'شہریت ترمیمی قانون کی وجہ سے ہمیں سڑکوں پر اترنا پڑا ہے، لیکن حکومت ہمیں سننے کو تیار نہیں ہے۔ دہلی کے شاہین باغ میں خواتین ایک مہینے سے احتجاج پر بیٹھی ہیں لیکن حکومت ایک بار بھی انہیں سننے نہیں گئی۔ ہم اس ملک کے شہری ہیں اس کی مٹی ہمارے آباو اجداد نے سینچی ہے۔ ایک کاغذ کی بنیاد پر ہماری شہریت کو کوئی کیسے ختم کر سکتا ہے۔
انہوں نے سوال کیا ملک روزگار کی کمی، مہنگائی سے جھوجھ رہا ہے ایسے میں ضرورت کیا تھی ایسےقانون کو لانے کی؟
خواتین شہریت ترمیمی قانون کو لے کر برابر احتجاج کر رہی ہیں، ان کا کہنا ہے ہمیں برابری کا حق حاصل ہے اس ملک میں۔ جب آئین بنا تب سے ہی سب کو برابری کا حق حاصل ہے۔ لہذا اس طرح کے قانون کو ملک کو کوئی ضرورت نہیں۔
