ریاست اترپردیش کے شہر کانپور کے سچیندی تھانہ علاقے میں بس اور ٹیمپو کے مابین تصادم میں 17 افراد ہلاک جبکہ 24 سے زیادہ مسافروں کے زخمی ہوگئے ہیں۔ پانچ کی حالت تشویشناک بنی ہوئی ہے جنہیں ہیلیٹ ہسپتال میں علاج کے لیے داخل کیا گیا ہے۔
اس حادثے پر اترپردیس کے وزیر اعلی یوگی آدتیہ ناتھ، وزیر اعظم نریندر مودی اور وزیر داخلہ امت شاہ نے افسوس کا اظہار کرتے ہوئے ٹویٹ بھی کیا۔ وزیراعلیٰ نے حادثے میں ہلاک ہونے والوں کے لواحقین کو فی کس دو لاکھ روپے کی مالی امداد کا اعلان کیا ہے۔ اس کے علاوہ انہوں نے ضلعی مجسٹریٹ کو ہدایت کی ہے کہ حادثے کی وجوہات کی تحقیقات کریں اور رپورٹ پیش کریں۔
وزیراعلیٰ یوگی آدتیہ ناتھ نے سڑک حادثے پر گہرے دکھ کا اظہار کرتے ہوئے سینیئر افسران کو ہدایت کی ہے کہ فوری طور پر موقع پر پہنچیں اور زخمیوں کو بہتر علاج معالجہ فراہم کریں۔
واضح رہے کہ یہ حادثہ کانپور شہر کے آؤٹر پر واقع سچیندی حلقہ میں اس وقت ہپیش آیا جب ایک پرائیویٹ بس پڑوسی ضلع اناؤ سے گجرات کی طرف جارہی تھی، تبھی سچیندی علاقے میں ایک ٹیمپو کو ٹکر مار دی، دونوں گاڑیوں کی رفتار کافی زیادہ ہونے کی وجہ سے حادثہ بھی کافی زیادہ سنگین ہوگیا۔
وزیراعظم نے ٹویٹ میں لکھا کہ کانپور کا سڑک حادثہ دلبرداشتہ ہے، اس حادثے میں کئی لوگوں کی جان چلی گئی، میں ان کے لواحقین سے اظہار تعزیت کرتا ہوں اور زخمیوں کے جلد صحتیاب ہونے کی دعا کرتا ہوں۔
امت شاہ نے ٹویٹ کیا کہ 'اترپردیش کے کانپور میں سڑک حادثہ انتہائی افسوسناک ہے۔ میں ان لوگوں کے لواحقین سے اظہار تعزیت کرتا ہوں جنہوں نے اس میں اپنی جان گنوائی ہے۔ بھگوان انہیں غم برداشت کرنے کی شکتی دے۔ میں زخمیوں کی جلد صحت یابی کی دعا کرتا ہوں۔
