اتراکھنڈ کے چمولی میں گلیشیئر پھٹنے اور ڈیم کے ٹوٹنے سے پیدا شدہ سیلابی صورتحال کے پیش نظر کانپور انتظامیہ کی جانب سے گنگا ندی کے کنارے آباد لوگوں کو اپنی حفاظت کی ہدایت جاری کر دی گئی ہے، ساتھ ہی منسلک تمام شعبوں کو احتیاطی اقدام اور تدابیر اختیار کرنے کے احکام جاری کر دیے گئے ہیں حالانکہ شہر کو ابھی فوری طور پر کوئی خدشہ نہیں ہے۔
اتراکھنڈ کے چمولی میں گلیشیئر پھٹنے کے بعد پانی کے تیز بہاؤ سے جوشی مٹھ پر بنے ڈیم کا کچھ حصہ ٹوٹ جانے سے پانی جس تیزی سے بڑھ رہا ہے، اس سے الک نندہ ندی کے ساتھ ساتھ گنگا ندی میں بھی تیزی سے پانی کی سطح میں اضافہ دیکھا جارہا ہے۔
پانی کے تیز بہاؤ کو دیکھتے ہوئے کانپور میں بنے گنگا بیرج ڈیم کا پانی خالی کرنا شروع کر دیا گیا ہے۔ وہیں گنگا ندی میں بڑھتے پانی کو دیکھتے ہوئے ضلع انتظامیہ نے گنگا ندی کے کنارے بسے بارہ گاؤں کو احتیاطی الرٹ جاری کر دیا ہے۔
گنگا ندی کے کنارے بسنے والے وہ تمام گاؤں جو اکثر سیلاب میں متاثر ہوتے رہے ہیں انہیں الرٹ جاری کر دیا گیا ہے کہ وہ اپنی حفاظت کے لئے احتیاطی قدم اٹھائیں۔ ضلع انتظامیہ نے منسلک تمام شعبہ جات کو حکم جاری کیا ہے کہ عوام کی حفاظت کی جائے اور ان کو کم سے کم نقصان ہو اس کی تدابیر کی جائے۔
ان مسائل کے پیش نظر کینل ڈپارٹمنٹ ( canal department ) کے افسران کا کہنا ہے کہ ابھی کسی طرح کا کوئی خدشہ نہیں ہے لیکن کچھ دن میں کانپور تک پانی آ جائے گا اس وقت کے لیے ابھی سے تدابیر کی جا رہی ہے۔
مزید پڑھیں: گلیشیئر پھٹنے سے اتراکھنڈ میں تباہی، وزیر اعلی کی ہر پل پر نظر
حالانکہ کانپور میں فوری طور پر کوئی خطرہ نہیں ہے لیکن چونکہ گلیشیئر کے پھٹنے سے ڈیم بھی ٹوٹا ہے تو اس لیے ابھی یہ اندازہ لگانا مشکل ہے کہ کتنا کیوسک پانی آئے گا اس کا ابھی اندازہ نہیں لگایا جا سکتا ہے اس لیے ہر طرح کی احتیاطی تدابیر کی جا رہی ہے۔
