جموں و کشمیر انتظامیہ نے سرحدی سیاحت کے فروغ دینے کے لیے ہند پاک سرحد پر واقع سچیت گڑھ سرحد کو امرتسر میں واہگہ سرحد کے طرز پر ترقی دے رہی ہے۔
ڈائریکٹر ٹورزم جموں وویک آنند رائے کے مطابق اس سلسلے میں 2 اکتوبر سے روزانہ 'ریٹریٹ تقریب' کا اہتمام کیا جائے گا تاہم واہگہ بارڈر میں ہونے والی روایتی پریڈ تقریب کے برعکس سچیت گڑھ میں صرف بارڈر سکیورٹی فورس (بی ایس ایف) کے جوان حصہ لیں گے، یعنی بھارت اور پاکستان کی مشترکہ پریڈ تقریب نہیں ہوگی۔
انہوں نے کہا کہ سچیت گڑھ میں منعقدہ ریٹریٹ تقریب کے دوران بی ایس ایف اہلکاروں کی طرف سے روزانہ ایک منظم پریڈ ہوگی۔
انہوں نے بتایا کہ سچیت گڑھ کو واہگہ سرحد کے طرز پر ترقی دینے کے لیے اکتوبر سے 'ریٹریٹ تقریب' کا انعقاد ہوگا، تاکہ سرحدی سیاحت کو فروغ مل سکے جو مذکورہ علاقے کے لوگوں کا دیرینہ مطالبہ تھا۔
ڈائریکٹر ٹورزم جموں کا کہنا ہے 'اگرچہ اس طرح کی کوئی تقریب منعقد نہیں ہوگی جس طرح واہگہ سرحد پر ہوتی ہے لیکن سیاحوں کو راغب کرنے کے لئے بی ایس ایف اہلکار ریٹریٹ تقریب کا اہتمام پابندی سے کریں گے۔'
وویک ائنند رائے نے کہا کہ محکمہ سیاحت جموں نے اس کے لئے درکار بنیادی ڈھانچے کو تیار کیا ہے اور سرحدی سیاحت پروجیکٹ کے تحت اس جگہ کو سیاحوں کے لئے باعث کشش بنانے کے لئے ایک ریستوران،ایک پارک اور دیگر سہولیات کو دستیاب رکھا جا رہا ہے۔
انہوں نے کہا کہ ریٹریٹ تقریب کے اہتمام کے لئے تمام تر تیاریوں کو حتمی شکل دی جا رہی ہے کیونکہ یہ قومی اہمیت کا بھی ایک ایونٹ ہے۔
صوبائی کمشنر جموں ڈاکٹر راگھو لنگر نے رواں برس 15 جون کو کہا تھا کہ سچیت گڑھ میں واہگہ بارڈر کے طرز پر ایک رنگا رنگ تقریب منعقد کرنے کا منصوبہ بنایا جائے گا۔
انہوں نے کہا کہ 'اس علاقے میں سیاحت کی بہت زیادہ صلاحیت ہے۔ لیفٹیننٹ گورنر منوج سنہا کی ہدایت پر سچیت گڑھ سرحد پر واہگہ بارڈر کے طرز پر ایک تقریب ہوگی جس میں 36 بٹالین بی ایس ایف کے جوان حصہ لیں گے۔
مزید پڑھیں:
- جموں و کشمیر: نو ماہ میں 132 عسکریت پسند ہلاک
- مرکزی حکومت کا جموں وکشمیر ترقی رپورٹ حقیقت سے بعید: پی اے جی ڈی
ان کا مزید کہنا ہے 'اوکٹرائی پوسٹ پر منعقد ہونے والی اس تقریب میں صرف بھارتی فوج اور لوگ شرکت کریں گے۔ ہماری بی ایس ایف کے ساتھ میٹنگ ہوئی جس میں ہم نے اوکٹرائی پوسٹ کو سیاحت کا مرکز بنانے کے بارے میں تفصیل سے بات چیت کی۔ ہم معاملے پر آگے کی کارروائی جاری رکھیں گے'۔
بتادیں کہ سچیت گڑھ ضلع جموں کے آر ایس پورہ تحصیل کا آخری سرحدی گاؤں ہے۔ یہ گاؤں آر ایس پورہ سے گیارہ کلو میٹر دوری پر واقع ہے۔سرحد کے اْس پار سچیت گڑھ کے مقابل پاکستان کا مشہور شہر سیالکوٹ واقع ہے اور سچیت گڑھ سے سیالکوٹ تک بھی صرف گیارہ کلو میٹر کی مسافت ہے۔
