جموں: گورنمنٹ میڈیکل کالج کے باہر احتجاج

جموں و کشمیر کے سرمائی دارالحکومت جموں میں آج نیشنل ہیلتھ مشن کے تحت کام کرنے والے عارضی ملازمین نے گورنمنٹ میڈیکل کالج جموں کے باہر احتجاج کیا۔

نیشنل ہیلتھ مشن اسکیم کے تحت محکمہ صحت میں کام کرنے عارضی ملازمین نے آج جموں میڈیکل کالج کے باہر احتجاج کیا۔ احتجاجی ملازمین نے جموں و کشمیر انتظامیہ سے مطالبہ کیا کہ ان کی عارضی ملازمت میں توسیع کی جائے۔

انہوں نے کہا کہ جموں وکشمیر انتظامیہ کی جانب سے ان کے مطالبات کے تئیں کوئی توجہ نہیں دی جارہی ہے جوکہ باعث افسوس ہے۔

ملازمین نے کہا کہ انتظامیہ کی عدم توجہی کے پیش نظر انہیں آج سڑکوں پر آنا پڑرہا ہے۔ احتجاجی ملازمین نے کہا کہ انہوں نے عالمی وبا کورونا وائرس کے دوران اپنے آپ کو خطرے میں ڈال کر کام کیا لیکن آج انہیں نوکری سے نکال دیا جارہا ہے۔

مظاہرین کے مطابق انتظامیہ کی جانب سے انہیں کام کرنے سے روکا جارہا ہے۔ انہوں نے کہا کہ ان کے مستقبل کے ساتھ کھلواڑ کیا جا رہا ہے۔
احتجاجی ملازمین نے ایل جی انتظامیہ سے مطالبہ کیا کہ ان کی ملازمت کی مدت بڑھا دی جائے تاکہ ان کی روزی روٹی جاری رہے۔