پارٹی ہیڈکوارٹر شہیدی چوک میں ایک پریس کانفرنس سے خطاب کرتے ہوئے کانگریس کے ریاستی ترجمان رویندر شرما، نائب صدر رمن بلا نے کہا کہ بی جے پی کی خواہش تھی کہ وہ موجودہ صورتحال جس میں پورے اپوزیشن قید و بند ہیں کا فائدہ اٹھاکر کلین سویپ کرے لیکن ان کا یہ خواب ادھورا ہی رہ گیا ۔ انہوں نے کہا کہ یہ جانتے ہوئے بھی کہ اپوزیشن جماعتیں الیکشن میں حصہ لینے کی پوزیشن میں نہیں ہیں تو بی جے پی نے بی ڈی سی انتخابات پارٹی بنیادوں پر کرانے کا فیصلہ کیا ۔
جموں و کشمیر پردیش کانگریس کمیٹی نے کہا کہ 'بھارتیہ جنتا پارٹی کو بی ڈی سی انتخابات میں ناکامی کا اعتراف کرنا چاہیے کیونکہ زمینی سطح کے عوامی نمائندگان نے پارٹی کو مسترد کرتے ہوئے زعفرانی خیمہ کو آئینہ دکھا دیا'۔ کانگریس پارٹی نے حالیہ بی ڈی سی چناو میں بی جے پی کو مسترد کرنے پر سرپنچوں و پنچوں کا شکریہ ادا کرتے ہوئے کہا کہ تمام اپوزیشن جماعتوں کے بائیکاٹ کے باوجود یہ صورت حال رہی ہیں اگر دیگر جماعتیں بھی الیکشن لڑرہی ہوتیں تو پھر بی جے پی کی صورتحال کیا ہوتی ۔
