جماعت اسلامی ہند راجستھان کی خاتون وینگ کی جانب سے ’’مضبوط پریوار مضبوط سماج‘‘ کے نام سے ایک مہم کی شروعات کی جا رہی ہے۔
مہم کے آغاز سے قبل ریاست راجستھان کے دارالحکومت جے پور میں نائن سرکل پر واقع پین سٹی پریس کلب میں جماعت اسلامی سے وابستہ کارکنان اور عہدیداران نے مہم کی تفصیلات فراہم کرنے کی غرض سے ایک پریس کانفرنس کا انعقاد کیا۔
پریس کانفرنس کے دوران خطاب کرتے ہوئے جماعت اسلامی ہند کی خاتون وینگ کی سیکریٹری روبینہ ابرار نے میڈیا سے خطاب کرتے ہوئے کہا کہ جماعت اسلامی ہند کی جانب سے 19 فروری سے 28 فروری تک ’’مضبوط پریوار مضبوط سماج‘‘ مہم کا آغاز کیا جا رہا ہے۔
انہوں نے بتایا کہ ’’موجودہ وقت میں عائلی مسائل خصوصا والدین اور بچوں کے مابین دوریاں، نوجوانوں کا رشتہ ازدواج سے دوری اختیار کرنا اور بھی کئی مسائل روز بروز بڑھتے جا رہے ہیں، جس سے خاندانی نظام متاثر ہو رہا ہے۔‘‘
انکے مطابق وہ مہم میں آن لائن اور آف لائن طریقے خاندانی نظام کو مضبوط بنانے سے متعلق آگہی فراہم کریں گے۔
پریس کانفرنس کے دوران انہوں نے کہا کہ ’’ایک مضبوط خاندان ہی مضبوط سماج کی بنیاد رکھ سکتا ہے، جب خاندان اور سماج مضبوط ہونگے تو ملک کی ترقی ہو سکے گی۔‘‘