ریاست راجستھان میں کانگریس حکومت کے دو برس مکمل ہونے پر آج بھارتیہ جنتا پارٹی کی او بی سی مورچہ کی جانب سے دارالحکومت جے پور میں احتجاجی مظاہرہ کیا گیا۔
احتجاجی مظاہرے کے دوران او بی سی مورچہ کی جانب سے ایک ریلی نکالی گئی، جو بی جے پی کے ریاستی دفتر سے روانہ ہوئی اور مختلف مقامات سے گذرتے ہوئے سیول لائن پھاٹک پر پہنچ کر اختتام پذیر ہوئی۔
ریلی میں شامل تمام لوگوں نے اپنے ہاتھوں میں بی جے پی کے پرچم کے ساتھ ساتھ سر پر کالی پٹی باندھ رکھی تھی، مظاہرین نے ریاستی کانگریس حکومت کے خلاف نعرے بازی اور وزیراعلیٰ اشوک گہلوت سے استعفے کا مطالبہ بھی کیا۔
او بی سی مورچہ کے ریاستی صدر اوم پرکاش نے کہا کہ راجستھان حکومت نے دو برس قبل عوام کو گمراہ کرکے اور دھوکہ دے کر ووٹ حاصل کرکے اپنی حکومت بنائی، اور حکومت بننے کے بعد دو سال سے ریاست میں کچھ بھی کام نہیں ہوا ہے، اس لیے راجستھان حکومت کو بیدار کرنے کے لیے ہماری جانب سے یہ احتجاجی مظاہرہ کیا گیا۔
انہوں نے کہا کہ دو برس قبل راجستھان کی حکومت کی جانب سے یہ اعلان کیا گیا تھا کہ ہم کسانوں کا قرض معاف کریں گے لیکن دو برس مکمل ہونے کے باوجود آج تک قرض معاف نہیں کیا گیا جبکہ راجستھان کا کسان ابھی تک اپنے قرض معافی کا منتظر ہے۔
انہوں نے مزید کہا کہ کوئی بھی وعدہ حکومت راجستھان کی جانب سے ابھی تک وفا نہیں کیا گیا ہے، اس کے باوجود ریاستی حکومت چشن منا رہی ہے، انہوں نے کہا کہ عام عوام کی حفاظت تو دور اس حکومت میں صحافی تک محفوظ نہیں ہیں۔
مزید پڑھیں: یوم تاسیس کے موقع پر کانگریس کی ترنگا یاترا
