عالمی وبا کورونا وائرس کی دوسری لہر کے درمیان مسلمانوں نے رمضان کے دوسرے جمعے کی نماز حکومتی ہدایات پر عمل کرتے ہوئے ادا کی۔ مسجدوں میں اتنے ہی لوگ نماز کے لیے پہنچے جنتے کی اجازت تھی۔ سماجی دوری اور مکمل احتیاط کے ساتھ راجستھان کی مساجد میں مصلیوں نے نماز جمعہ ادا کی، نماز جمعہ کے بعد بار گاہ الہی سے وبا کے خاتمے کے لیے خصوصی دعا کی گئی۔
جئے پور کے کربلا کی درگاہ میں واقع بڑی مسجد کے حاجی افضل نے ای ٹی وی بھارت سے بات چیت کے دوران بتایا کہ جو لوگ مساجد میں نماز ادا کرنے کے لیے پہنچے، ان تمام لوگوں کو یہ ہدایت دی گئی کہ حکومت کی گائیڈ لائن کے مطابق سبھی لوگ ماسک لگائیں اور سماجی دوری کے ساتھ ہی نماز ادا کریں'۔
انہوں نے بتایا کہ 'ہم لوگ اپنی عبادت کے دوران بھی کوئی لاپروائی نہیں کریں گے اور کوئی ایسا نہیں کریں گے جو قانون کے خلاف ہو۔'
واضح رہے کہ راجستھان میں مذہبی مقامات کو بند کرنے کا فیصلہ حکومت کی جانب سے لیا گیا ہے لیکن رمضان المبارک کے مقدس ماہ کے مد نظر مساجد میں چند لوگوں کو نماز پڑھنے کی اجازت دی گئی ہے'۔
