ریاست راجستھان کے وزیر صحت رگھو شرما نے راجستھان میں سیاسی بحران کے دوران بھارتی جنتا پارٹی پر الزام عائد کرتے ہوئے کہا کہ موجودہ وقت میں بھارت کی عوام کورونا وبا کو شکست دینے میں مشغول ہے جبکہ بی جے پی عوام کی منتخب کردہ حکومت کو گرانے میں مشغول ہے۔
رگھو شرما نے کہا کہ مرکز میں دوسری مرتبہ عوام نے اکثریت کے ساتھ بی جے پی کو کامیاب بنایا تھا لیکن دہلی میں جس طرح سے کورونا کا علاج کیا جارہا ہے وہ بھارت کے سامنے ہیں۔
انہوں نے راجستھان حکومت کی تعریف کرتے ہوئے کہا کہ راجستھان میں جس طرح سے کورونا وبا کے درمیان کانگریس حکومت اپنی خدمات انجام دے رہی ہے وہ قابل تعریف کے ساتھ ساتھ دوسری ریاستوں کے لیے مثال بھی ہے۔
انھوں نے کہا کہ کورونا بحران میں بھارتیہ جنتا پارٹی کو عوام کی کوئی فکر نہیں ہے اس لیے وہ متعدد ریاستوں کی منتخب کردہ حکومتوں کو گرانے میں لگی ہوئی ہے اور انھوں نے کئی حکومتوں کو گرایا بھی ہے لیکن بی جے پی راجستھان میں کامیاب نہیں ہوگی۔
انہوں نے مزید کہا کہ کورونا وبا میں بی جے پی کسی کی زندگی بچانے کے بجائے کانگریس رکن اسمبلی کی خرید و فروخت کرنے کا کام کر رہی ہے۔
