کتوں کی دہشت کا اندازہ اس بات سے لگایا جاسکتا ہے کہ آج قبرستان میں فاتحہ پڑھنے کے لئے پہنچے ایک شخص کو کتوں نے زخمی کر دیا۔ کتوں نے ان کو اس طرح سے زخمی کیا کہ ان کو فوراً ہی ہسپتال جانا پڑ گیا، اگر وہاں پر موجود لوگ ان کو نہیں بچاتے تو حالات کچھ اور ہی ہوتے۔ ایسے میں ایک بڑا سوالیہ نشان جے پور نگر نگم اور قبرستان کمیٹی پر کھڑا ہوتا ہوا نظر آ رہا ہے، ایسا پہلی مرتبہ نہیں ہوا ہے جب کتوں نے کسی شخص پر حملہ کیا ہو بلکہ کئی لوگوں کو یہاں پر کتوں نے کاٹ لیا ہے۔
وہیں یہ کتے قبروں سے لاش کو نکال کر کھاتے ہوئے بھی نظر آتے ہیں۔ آج کتوں کے حملے میں زخمی ہونے والے وکیل احمد نے بتایا کہ وہ روزانہ اپنی بیوی کی قبر پر فاتحہ پڑھنے کے لئے پہنچتے ہیں۔ آج بھی کھڑے ہو کر فاتحہ پڑھ رہے تھے، اتنی دیر میں آس پاس ایک کتے نے ان پر حملہ کر دیا اور ان کو زخمی کردیا۔
انہوں نے کہا کہ یہ کتے اتنے خطرناک ہو چکے ہیں کہ ہم لوگوں کو کافی ڈر ان کتوں سے لگ رہا ہے۔ انہوں نے بتایا کہ کل میں پانی کی ٹنکی کے پاس ہاتھ دھونے کے لیے گیا تھا، اتنی دیر میں کتوں نے مجھ پر حملہ کر دیا اور جب میں چلایا تو آس پاس کے لوگوں نے مجھے بچایا۔
