ریاست مدھیہ پردیش کے شہر جبل پور میں بھی میں کورونا سے متاثرہ مریضوں کی تعداد بڑھ رہی ہے۔ ایسی صورتحال میں تمام سماجی تنظیموں کے ساتھ سیاسی جماعتیں بھی انتظامیہ کی مدد کے لئے آگے آرہی ہیں۔
ضلع کانگریس کے صدر دنیش یادو نے کہا ہے کہ بحران کی اس گھڑی میں اگر انتظامیہ کو عمارت کی ضرورت ہو تو کانگریس کا دفتر استعمال کیا جاسکتا ہے۔ راجیہ سبھا کے رکن پارلیمنٹ ویوک تنکھا نے بھی ضلع کانگریس کمیٹی کی اس تجویز کی تعریف کی ہے۔
بتادیں کہ جبل پور مدھیہ پردیش کا پہلا ضلع تھا جہاں 20 مارچ کو کورونا مثبت کے 04 واقعات رپورٹ ہوئے تھے۔ جس کے بعد یہ تعداد بڑھ کر 78 ہوگئی ہے۔
کورونا مثبت مریضوں کی تعداد کے پیش نظر ضلع انتظامیہ نے شہر میں متعدد ہوٹلوں، ریزورٹز، سرکاری ہاسٹلز اور دیگر مقامات کو قرنطینہ مراکز بنایا ہے۔
