مدھیہ پردیش کے دیواس کے گاؤں شپرا میں ایک گھر میں پاکستانی پرچم لہراتے ہوئے دیکھا گیا تھا، جس کی ویڈیو سوشل میڈیا پر وائرل ہونے کے بعد ایس ڈی ایم پردیپ سونی نے معاملے کا نوٹس لیا اور تحصیلدار کو معاملے کی فوری تحقیقات کرنے کی ہدایت دی۔
موقع پر پہنچے ریونیو انسپکٹر لکھن سنگھ پوربیا نے معاملے کی جانچ کی۔ اس کے بعد انڈسٹریل تھانہ علاقہ پولیس نے شپرا کے باشندہ فاروق خاں کے خلاف آئی پی سی کی دفعہ 153 (اے) اور (بی) کے تحت مقدمہ درج کر لیا ہے۔
اطلاعات کے مطابق شپرا میں ایک مکان پر پاکستانی پرچم لہراتے ہوئے ویڈیو سوشل میڈیا پر وائرل ہوئی تھی۔ اس کے بعد موقع پر پہنچے ریونیو انسپکٹر لکھن سنگھ پوربیا نے بتایا کہ پاکستانی پرچم فاروق کے گھر کی چھت پر لگایا گیا تھا۔ گھر کے مالک فاروق نے بتایا کہ 12 سالہ نابالغ نے لاعلمی کے باعث جھنڈا لگایا تھا۔
پاکستانی پرچم کہاں سے آیا؟ تنہا ایک 12 سالہ بچے نے چھت میں اتنا اونچا پرچم کیسے لگایا؟ اس طرح کے سوالات کے جوابات نہیں مل سکے ہیں۔ انڈسٹریل ایریا پولیس اسٹیشن نے معاملے کے متعلق فاروق کے خلاف مقدمہ درج کرلیا ہے۔
ملزم سے پولیس پوچھ گچھ کررہی ہے۔ پولیس افسران اس معاملے میں کچھ بھی کہنے سے گریز کر رہے ہیں۔
