ریاست مدھیہ پردیش کے اجین میں پاپولر فرنٹ آف انڈیا کے زیر اہتمام جلسہ منعقد کیا گیا جس میں پی ایف آئی عہدیداروں نے لوگوں کی فلاح کے متعلق اپنے مقاصد پر روشنی ڈالی۔
اس موقع پر سماجی اور تنظیم کے کارکن نے خطاب کیا۔ پی ایف آئی کے عہدیداروں نے تنظیم کی کارگزاریوں پر روشنی ڈالی جبکہ سماجی کارکن نے حکومت پر سنگین الزامات عائد کئے۔
سماجی کارکن رام سوروپ منتری نے موجودہ حکومت پر طنز کرتے ہوئے کہا کہ جو کوئی بھی حکومت کے رابطے میں آتا ہے یا اس میں شمولیت اختیار کر لیتا ہے تو وہ بے داغ ہو جاتا ہے اور وہ اگر حکومت کے مخالف ہوتا ہے تو پھر اس کو حکومت کا سامنا کرنا پڑتا ہے۔
پاپولر فرنٹ آف انڈیا کے صوبائی صدر کفیل رضا نے کہا کہ ہماری تنظیم معاشرے کے دبے کچلے لوگوں کی فلاح اور بہبود کے لیے کام کر رہی ہے۔ انہوں نے کہا کہ ہماری کوشش ہوتی ہے کہ ہم علم کو زیادہ سے زیادہ فروغ دیں۔ ہماری تنظیم ہر ضرورت مند کے لئے شانہ بشانہ کام کرتی ہے وہ چاہے مہلک وبا کا دور ہو یا پھر قدرتی آفت کا وقت ہو پاپولر فرنٹ آف انڈیا عوامی خدمات ترجیحی بنیاد پر کرتی ہے۔
