یونائیٹیڈ مسلم فورم نے نیوزی لینڈ کے شہر کرائسٹ چرچ میں گذشتہ جمعہ کو دو مساجد میں پیش آئے دہشت گردانہ حملے کی سخت مذمت کی اور ہلاک ہونے والے کے لیے دعا مغفرت اور زخمیوں کے لیے صحتیابی کی بھی دعا کی گئی۔
فورم کا اجلاس صدر مولانا محمد رحیم الدین انصاری کی صدارت میں تعمیر ملت کے صدر دفتر مدینہ منشن نارائن گوڑہ حیدرآباد میں منعقد ہوا۔ فورم کے جنرل سکریٹری سید منیر الدین احمد مختار کے مطابق نیوزی لینڈ کے واقعہ پر اجلاس نے شہداء کو خراج عقیدت پیش کرتے ہوئے ان کے لواحقین سے ہمدردی کا اظہار کیا۔
اجلاس نے اس واقعہ پر حکومت نیوزی لینڈ اور اس ملک کے عوام کے اظہار رنج اورمتاثرین کے تئیں جذبے ہمدردی کی ستائش کی۔
نیوزی لینڈ کی پارلیمنٹ کے اجلاس میں قرآن کریم کی تلاوت، ترجمہ وواقعہ پر بشمول وزیر اعظم وجمیع ارکان پارلیمنٹ کا مسلمانوں ومتأثرین کو دے گئے دلاسے کا خیر مقدم کیا، فورم کے اجلاس میں نیوزی لینڈ واقعہ کے شہداء اور لواحقین کے لیے معتمد صدر مجلس علمائے دکن مولانا سید شاہ قبول بادشاہ شطاری نے رقت انگیز دعا کی۔
اجلاس میں پارلیمنٹ کے انتخابات، ریاستی ومرکزی صورتحال پر تبادلہ خیال کیا گیا، ملک کے موجودہ حالات کو انتہائی نامساعدہ قرار دیتے ہوئے ایک سیکولر وکارکرد حکومت کی توقع کی گئی۔ اجلاس نے حیدرآباد پارلیمانی نشست سے مجلس اتحاد المسلمین کی تائید کا اعلان کیا۔
قوم وملت کے تئیں صدر مجلس ورکن پارلیمنٹ بیرسٹر اسد الدین اویسی کی خدمات کو خراج تحسین پیش کیا۔ فورم کے رفقاء نے حیدرآباد کے عوام سے مجلس کو بھاری اکثریت سے کامیاب بنانے کی اپیل کی، ریاست تلنگانہ کے ما بقیہ سولہ پارلیمانی حلقوں سے فورم نے تلنگانہ راشٹریہ سمیتی کی تائید کا اعلان کیا۔ اجلاس کا اختتام مولانا مفتی صادق محی الدین فہیم کی دعا پر ہوا۔
