وزیر اعظم نریندر مودی کے جل جیون مشن کے تحت ’ہر گھر میں نل سے پانی‘ پہنچانے کے خواب کو مزید تین ریاستیں جلد ہی شرمندہ تعبیر کرنے کی حالت میں پہنچ چکی ہیں، جن میں تلنگانہ جلد ہی مشن کا 100 فیصد نشانہ حاصل کرنے والی ملک کی دوسری ریاست بن جائے گا۔
گوا نے گذشتہ ہفتے جل جیون مشن کے تحت اپنے تمام دیہی خاندانوں کو ’ہر گھر میں نل سے پانی‘ فراہم کرنے کے مقصد کو حاصل کرکے پہلی ریاست ہونے کا اعزاز حاصل کیا ہے۔
اس سلسلے میں تلنگانہ 98 فیصد سے زیادہ گھروں کو نل سے پانی مہیا کرنے میں کامیاب رہا ہے، جبکہ پڈوچیری نے 87 فیصد سے زیادہ اور گجرات نے 80 فیصد سے زیادہ کا نشانہ حاصل کیا ہے۔
مشن کے تحت گذشتہ ایک سال کے دوران اب تک 2.38 کروڑ دیہی خاندانوں کو نل سے پانی فراہم کیا جاچکا ہے۔ اس اسکیم کی توجہ دیہی خواتین اور بچوں پر زیادہ ہے اور اس کے تحت مہم چلاکر ان کو صاف پانی مہیا کرانا ہے۔
وزیر اعظم کا کہنا ہے کہ پینے کے پانی کے بحران کا سب سے زیادہ دیہی خواتین کوسامنا کرنا پڑتا ہے اور اگر جل جیون مشن کے تحت ہر گھر کو نل سے پانی پہنچایا جاتا ہے تو اس سے دیہی علاقوں کی خواتین کی زندگی میں سب سے بڑی بہتری اور سب سے بڑی تبدیلی آئے گی۔
