ریجنل پاسپورٹ دفترکواقلیتی کمیشن کا نوٹس

تلنگانہ اقلیتی کمیشن نے ریاست میں اردو کو دوسری سرکاری زبان کا درجہ حاصل رہنے کے باوجود ریجنل پاسپورٹ آفس حیدرآباد اور تمام پاسپورٹ سیوا مراکز کے سائن بورڈس پر اردو کے ندارد رہنے کا سخت نوٹس لیا ہے۔

ریاست تلنگانہ میں ایک درخواست گزار کی شکایت پر اقلیتی کمیشن نے ریجنل پاسپورٹ آفس کو ایک نوٹس جاری کیا ہے۔
درخواست گزار نے کمیشن کو اس بات سے مطلع کروایا کہ پاسپورٹ مراکز پر آویزاں سائن بورڈز سے اردو ندارد ہے اور اس سے لسانی عصبیت ظاہر ہوتی ہے۔
درخواست گزار نے کہا کہ اردو زبان کا بھارت سے نہ صرف تعلق ہے بلکہ بلا لحاظ مذہب و ملت اردو زبان ریاست تلنگانہ کی گنگا جمنی تہذیب کا ایک حصہ ہے۔
حکومت تلنگانہ نے اردو زبان کو ریاست کی دوسری زبان کا درجہ دیا ہے، جس کے تحت گزشتہ برس مختلف محکمہ جات، دفتر وزیر اعلی، اسمبلی،ڈی جی پی آفس،پولیس کمشنریٹ اور ضلع کلکٹریٹس میں اردو آفیسرس کا تقرر عمل میں لایاگیا تھا۔