تلنگانہ کے وزیر انفارمیشن ٹکنالوجی کے تارک راما راؤ نے واضح کر دیا ہے کہ حکمران جماعت ٹی آر ایس نہ صرف تعلیم فراہم کر رہی ہے بلکہ مسابقتی دنیا میں بہتر راہ فراہم کر رہی ہے۔
انہوں نے راجنا سرسلہ ضلع مستقر میں 2.25 کروڑ روپے سے تعمیر شدہ ڈگری کالج کی عمارت کا افتتاح کیا۔ اس موقع پر منعقد تقریب سے خطاب کرتے ہوئے انہوں نے کہا کہ گمبھی راؤ پیٹ میں خستہ حالی کی شکار عمارت کو منہدم کرتے ہوئے اس جگہ پر کے جی تا پی جی تعلیم کے لئے نئی عمارت کی تعمیر عمل میں لائی جائے گی۔
انہوں نے ساتھ ہی یہ بھی کہا کہ ایلاریڈی پیٹ میں ڈگری کالج کی عمارت کی تعمیر کی ذمہ داری ان کی ہوگی۔طلبا کیلئے ہاسٹل کی عمارت بھی تعمیر کی جائے گی۔
وزیراعلی کے چندرشیکھرراو کی قیادت میں تلنگانہ میں سب سے زیادہ 940 گروکل اسکولس کی تعمیر عمل میں لائی گئی ہے۔ ہر طالب علم کو باریک چاول سے تیارکردہ غذا فراہم کی جا رہی ہے۔ اعلی تعلیم کے خواہشمند طلبا کو جیوتی راو پھولے، امبیڈکر اوورسیز اسکالرشپس کے ذریعہ فیس کی بعض ادائیگی کی جا رہی ہے۔ سنارے کے نام سے لائبریری میں مسابقتی امتحانات کی تیاری کے لئے کتابیں دستیاب کروائی جا رہی ہیں۔
یہ بھی پڑھیں: کسانوں کو ان کا حق دیا جائے: موومنٹ فار پیس اینڈ جسٹس
انہوں نے کہا کہ ریاست میں صنعتوں کے قیام کے لئے آگے آنے والوں کو اس مقصد کے لئے جلد ہی اجازت نامے دیے جا رہے ہیں۔ ٹی ایس آئی پاس کے ذریعہ تقریبا 14 لاکھ افرادکو روزگار فراہم کیا جا رہا ہے۔ ہر مہارت رکھنے والے کو ملازمت کا موقع فراہم کیا جا رہا ہے۔ انہوں نے واضح کیا کہ حکومت خود روزگار رکھنے والوں کی حوصلہ افزائی کررہی ہے۔
یواین آئی
