تلنگانہ: پولیس اور سی پی آئی کے دفتر پر سکیورٹی میں اضافہ

دفتر ڈی جی پی پولیس کے محاصرہ کی سی پی آئی کی جانب سے کی گئی اپیل پر پولیس سربراہ کے دفتر کے اطراف سیکوریٹی میں اضافہ کردیاگیا۔

سی پی آئی اور اس سے ملحقہ تنظیموں نے اتوار کی شب سی پی آئی کے دفتر مخدوم بھون میں پولیس کے گھسنے اور بھوک ہڑتالی رہنما سامباسیواراو کوزبردستی طور پر اپنے ساتھ لے جانے پر شدید ناراضگی کا اظہار کرتے ہوئے دفتر ڈی جی پی کے محاصرہ کی اپیل کی تھی۔
سامباسیواراو،تلنگانہ آرٹی سی کے ورکرس کے مطالبات کی حمایت میں بھوک ہڑتال کررہے تھے۔ان کو پولیس نے مخدوم بھون سے اٹھا کر زبردستی ہسپتال داخل کردیا۔سی پی آئی کے رہنماوں نے اس کے ہیڈ کوارٹرس میں پولیس کے گھسنے کی مذمت کی۔ اس احتجاج کی اپیل پر پولیس نے مشیر آباد علاقہ میں واقع سی پی آئی کے دفتر کے ساتھ ساتھ دفتر ڈی جی پی میں بھی سیکوریٹی میں اضافہ کردیا اور پولیس کی بھاری تعداد کو تعینات کردیاگیا ہے، تاکہ سی پی آئی کے کارکنوں کو وہاں آنے سے روکا جاسکے۔