ریاست تلنگانہ میں گھر سے باہر نکلنے والے افراد کو فیس ماسک لگانا لازمی ہے۔ حکومت کی جانب سے اس سلسلے میں احکامات جاری کئے گئے اور خلاف ورزی کرنے پر ہزاروں روپے جرمانے کے علاوہ عدالتی کارروائی کا انتباہ دیا گیا۔ حکومت کے احکامات کے بعد بازار میں فیس ماسک کی طلب میں بے حد اضافہ ہوا ہے۔ ہمہ اقسام کے فیس ماسک بازار میں دستیاب ہیں۔ مختلف پیشوں سے جڑے افراد اب فیس ماسک فروخت کرتے ہوئے اپنی ضروریات پوری کر رہے ہیں۔
عابڈس کے علاقے میں ماسک فروخت کرنے والے محمد افضل نے بتایا کہ وہ ایک ماہر الیکٹریشن ہیں اور لاک ڈاؤن سے قبل وہ دن میں پانچ سو تا ہزار روپئے باآسانی کما لیتے تھے لیکن لاک ڈاؤن کے باعث ان کا خاندان فاقوں پر مجبور ہے جس کے باعث انہیں اپنا پیشہ ترک کر کے اس کاروبار کو اختیار کرنا پڑا، جس سے وہ روزانہ دو تا تین سو کما لیتے ہیں۔ ریاست اوڈیشہ سے تعلق رکھنے والی نندنی لال ڈاؤن سے قبل ایک شاپنگ مال میں سیلس گرل کے طور پر کام کرتی تھی لیکن لاک ڈاؤن کے باعث مالس بند ہیں جس کی وجہ سے اس کے گھر میں معاشی تنگی چل رہی ہے، اب وہ فیس ماسک کے کاروبار سے جڑ کر اپنے اخراجات پورے کر رہے ہیں۔
