سابق ایم پی کویتا کے ٹویٹر پر ایک ملین فالوورس

تلنگانہ کے حلقہ لوک سبھا نظام آباد کی سابق رکن پارلیمنٹ و تلنگانہ جاگرتی تنظیم کی صدر کویتا کے ٹوئیٹر پر ایک ملین فالوورس ہوگئے ہیں۔ کویتا جنوبی ہند کی پہلی خاتون سیاست دان کے طور پر ابھری ہیں جن کے ایک ملین فالوورس ٹوئیٹر پر ہوگئے ہیں۔

تلنگانہ کے علاوہ بھارت کی دیگر ریاستوں کے افراد بھی ان کے فالوورس ہیں۔ کویتا جو تلنگانہ کے وزیراعلی کے چندر شیکھر راو کی دختر بھی ہیں، نے 2010ء میں ٹوئیٹر اکاونٹ بنایا تھا۔ مائیکرو بلاگنگ کی اس اہم سائیٹ پر مدد کے خواہشمندوں کے ٹویٹز پر وہ ردعمل ظاہر کرتے ہوئے ان کی مدد کو یقینی بناتی ہیں۔ کویتا نے ان کے ٹوئیٹر پر ایک ملین فالوورس پر تمام کا شکریہ ادا کیا۔ انہوں نے اپنی تصویر کے ساتھ کئے گئے ٹوئیٹ میں کہا ”ہم ایک ملین ہوگئے ہیں۔ غیرمشروط تعاون پر آپ تمام کا شکریہ“۔