ٹرین میں چوری، ملزمین گرفتار

ریاست بہار کے ضلع گیا میں ٹرین سے تقریبا ساڑھے چودہ لاکھ روپے مالیت کے مانیٹرز، اسکینرز اور پرنٹرز لے کر چور فرار ہوگئے۔

اطلاع کے مطابق آنند وہار سیالدہ ایکسپریس سے چوری ہوئے سارے سامان بی ایس ایف کو سپلائی کے لیے لے جایا جارہا تھا۔

پولیس نے پانچ افراد کو گرفتار بھی کیا ہے اور ساتھ ہی کئی سامان برآمد کیا ہے۔ ریلوے پولیس نے بڑی کامیابی حاصل کی ہے۔

آرپی ایف نے آنند وہار سیالدہ ایکسپریس سے گزشتہ روز چوری ہوئے قریب ساڑھے چودہ لاکھ روپئے کے سامانوں کو بہار کے اورنگ آباد اور گیا ضلعے سے برآمد کیا ہے۔

واضح رہے کہ چرائے گئے سارے سامان کولکاتا سے سی آرپی ایف کو سپلائی کے لئے جارہے تھے۔تبھی گیا اسٹیشن کے قریب ٹرین کے ایس ایل آر بوگی کو کاٹ کر سامانوں کی چوری کی گئی تھی۔

برآمدہوئے سامانوں میں 43 مانیٹرز، گیارہ اسکینرز سمیت کئی الیکٹرانک سامان ہیں، مغل سرائے ڈیویزن آر پی ایف کے سنیئرکمانڈنٹ آشیش مشرا نے پریس کانفرنس کرکے گیا میں جانکاری دی کہ تیس ستمبر کو چوری ہونے کے بعد مغل سرائے ڈیویزن، داناپورڈیویزن اور دھنباد ڈیویزن سمیت کولکاتا کی آر پی ایف، اور سی آئی بی ٹیم کو اس معاملے کی تفتیش کے لیے لگا یا گیا تھا۔

ٹیم نے گیا، اورنگ آباد ضلع کے کئی علاقوں میں چھاپے ماری کی تھی ۔پولیس کی ٹیم صارف بن کر ان سامانوں کی خریداری کے لئے اورنگ آباد پہنچی، جہاں ایک ہوٹل میں چوروں کا یہ گروہ سامان لیکر پہنچا، جہاں سے اس ٹیم نے انہیں گرفتار کیاہے۔

پولیس کے مطابق اس معاملے میں پانچ افراد کوگرفتار کیا گیا ہے،جس میں دوافراد گیا سے اور باقی تین اورنگ آباد ضلع کے رہنے والے ہیں۔

انہوں نے بتایاکہ اس گروہ کے سرغنہ سمیت 8 افراد ابھی فرار ہیں، انکی گرفتاری کے لئے چھاپے ماری کی جارہی ہے، یہ سبھی بین ریاستی گروہ کے افراد ہیں اور اس سے قبل بھی انکے ذریعے کئی واردات انجام دئے جا چکے ہیں۔