ریاست بہار کے ضلع گیا میں ہندوستانی عوام مورچہ پارٹی کی جانب سے ضلع پارٹی دفتر میں احتجاج کیا گیا۔
احتجاج کے ذریعے ریاستی و مرکزی حکومت پر ہم پارٹی کے رہنماوں نے شدید نکتہ چینی کرنے کے ساتھ ساتھ حکومت کے پندرہ جون کے بعد قرنطینہ مراکز کو بند کئے جانے کے فیصلے کی سخت مخالفت کی ہے۔
احتجاج کے دوران حکومت سے مطالبہ کیا گیا کہ بہار میں قرنطینہ مراکز کی مدت میں توسیع کیا جائے اور ساتھ ہی کورنٹین سینٹر میں مہاجر مزدوروں کے لیے کھانے پینے اور انکے قیام کے لیے بہتر انتظامات کرائے جائیں۔
مہاجر مزدوروں کو روزگار فراہم کرنے کے علاوہ منصوبہ بند طریقے سے کورونا انفیکشن کی جانچ مہم چلانے کا بھی مطالبہ کیا گیا ہے۔
ہم پارٹی کے دیگر رہنماوں نے کہا کہ حکومت اگر انکے مطالبات کو پورا نہیں کرتی ہے تو بڑے پیمانے پر احتجاج ہونگے۔
ضلع صدر ڈاکٹر صبغت اللہ خان عرف ٹوٹو خان نے کہاکہ حکومت صرف کورونا سے بچاو اور راحت کے کاموں کی خانہ پری کر رہی ہے، انتظامات کے نام پر بدعنوانی ہوئی ہے، غریب و بے سہارا افراد جنکے پاس راشن کارڈ ہو یا نہ ہو انکو خوردونوش کی اشیاء نہ کے برابر دی گئی ہے۔
انہوں نے مزید کہا کہ خط افلاس سے بھی نیچے رہنے والے افراد کو لازمی طور سے اشیاء خوردنی ہر ماہ دی جائے اور ساتھ ہی بہار میں بڑھتے جرائم پر قابو پایا جائے، حکومت مہاجر مزدوروں کے روزگار کے لیے خصوصی ٹیم کی تشکیل کرکے روزگار دستیاب کرائے۔
