تاہم اس سال محکمہ جنگلات کے علاقائی افسر 'رینجر' محمد افسر کے سخت رویہ کی وجہ سے افیم کی کاشت کرنے والے مافیاوں کی کمر ٹوٹ گئی ہے۔ محمد افسر کی کارروائی مسلسل جاری ہے۔ 20 دسمبر 2019 سے افیم کی کاشت کو مستقل طور پر ختم کرنے کے لئے ایکشن جاری ہے۔ رینجر کی سربراہی میں 346 ایکڑ اراضی پر افیم کی کاشت تباہ کردی گئی ہے۔ رواں برس افیم کی کاشت کے خلاف سب سے بڑی کارروائی محکمہ جنگلات نے کی ہے۔
محکمہ جنگلات کی طرف سے فصل کو تباہ کرنے کے ساتھ ساتھ منشیات ایکٹ کے تحت قانونی کارروائی بھی شروع کردی گئی ہے۔ محکمہ جنگلات اور پولیس اب ان مافیاوں کی شناخت کر رہی ہے جو افیم کی غیر قانونی کاشت کررہے ہیں۔ اس کے لئے انہیں کئی سطحوں پر تلاش کیا جارہا ہے۔
کاشتکاری کے لئے مقامی طور پر کون پیسہ خرچ کر رہا ہے ، کون اس کا مرکزی رہنما ہے، اس کا پتہ لگائے جانے کی کوشش کی جا رہی ہے۔ گیا کے بارہ چٹی علاقے میں افیم کی کھیتی کے بعد ہوٹلوں سے اسمگلنگ کی جاتی تھی۔ بہار سمیت دیگر ریاستوں کے لوگ جی ٹی روڈ پر محکمہ جنگلات کی اراضی پر بھی لائن ہوٹل کھول کر کام کر رہے ہیں۔ ان ہوٹلوں سے افیم کافی آسانی سے راجستھان، پنجاب، اترپردیش، مغربی بنگال پہنچ رہی تھی۔ پچھلے برس پولیس کو اس کے بہت سارے ثبوت بھی ملے تھے۔
محکمہ جنگلات کے ضلع افسر ابھیشیک کمار سنگھ نے بتایا کہ 'اس سال افیم کی کاشت کو ختم کرنے میں ایس ایس بی کا تعاون قابل ستائش تھا۔ ایس ایس بی کے جوانوں نے علاقے کا محاصرہ کیا اور افیم کی کاشت کو تباہ کردیا۔'
انہوں نے بتایا کہ 'افیم کی کاشت پر ڈرون سے پہلے نگرانی کی گئی اور اس کے بعد اس کے خلاف کی جانے والی کارروائی کی تیاری کی جاتی ہے۔'
