نکسل متاثرہ علاقہ سے تعلق رکھنے والی مدھومالا کی کامیابی پر اس کی چہار جانب ستائش کی جا رہی ہے۔ مدھومالا کی کامیابی سے گھروالوں سمیت پورے گاؤں میں خوشی کی لہر ہے۔ مدھو مستقبل میں سول سروس میں جانا چاہتی ہے۔
گیا کے انتہائی نکسل متاثرہ علاقہ ڈومریا بلاک کے کولھوبار پنچایت کے سون پورہ گاؤں کی مدھومالا نے بہار بورڈ کے امتحان میں دسواں مقام حاصل کیا ہے۔ ادے کمار کی دوسری بیٹی مدھومالا نے 471 نمبرات حاصل کرکے یہ کامیابی حاصل کی ہے۔ ان کے والد ادے کمار کسان ہیں۔
مدھومالا کی تعلیم گاؤں کے قریب ہی دوسرے گاؤں میں واقع کسان ہائی اسکول شیو نگر دیوچندی میں ہوئی۔ ایک بہت ہی عام گھرانے کی بیٹی مدھو کو کوچنگ کی کوئی سہلوت حاصل نہیں تھی، اور نہ ہی اسے اچھی اشاعت کی کتابیں لینے کی مالی صلاحیت تھی۔ یہی وجہ ہے کہ اس نے اپنے گاؤں کے ایک رشتے دار کی مدد سے امتحان کی تیاری مکمل کی اور اب متحان میں دسواں مقام حاصل کیا ہے۔ اس کے والدین چاہتے ہیں کہ ان کی بیٹی ڈی ایم بنے۔
واضح ہو کہ اس بار 80.59 فیصد طلباء پاس ہوئے ہیں۔ ان میں سے 4 لاکھ 03 ہزار 392 طلبا فرسٹ ڈویژن ہوئے، 5 لاکھ 4 ہزار 217 دوسرے ڈویژن میں اور 2 لاکھ 75 ہزار 402 تیسری ڈویژن سے پاس ہوئے ہیں۔ تقریبا 12 لاکھ 2 ہزار 30 طلبا نے میٹرک کا امتحان پاس کیا ہے۔
