لاک ڈاؤن کی وجہ سے دوسری ریاستوں میں پھنسے ہوئے بہاری مزدوروں کو لیکر آج خصوصی مزدور ٹرین کی گیا ریلوے اسٹیشن پر آمد ہوئی ہے۔ تلنگانہ سے 1200 مزدوروں پر مشتمل خصوصی ٹرین آج صبح گیا ریلوے اسٹیشن پہنچ چکی ہے۔ تمام مزدوروں کو ریلوے اسٹیشن پر ایک ایک کرکے اتارا گیا، اسکے بعد میڈیکل کی ٹیموں نے ان کی صحت کی جانچ کی ہے۔ اس کے بعد انہیں بسوں کے ذریعے انکے اپنے اپنے ضلع کو روانہ کردیا گیا ہے۔
حیدرآباد سے آئے مزدوروں میں شامل ذیشان انصاری نے بتایا کہ 'وہ ایک دوکان میں کام کرتے تھے۔ لاک ڈاؤن کے باعث فیکٹری اور دکانیں بند ہوگئیں۔ کھانے پینے کی پریشانی تقریبا 1 مہینے سے پیدا تھی۔ بڑی مشکل سے وقت گزر رہا تھا۔ کبھی کبھار مقامی انتظامیہ کھانا فراہم کرتی تھی۔ بہت دنوں سے گھر آنا چاہتے تھے۔ اس دوران مقامی پولیس کے ذریعہ اطلاع ملی کہ بہار کے گیا کیلئے خصوصی ٹرین جانے والی ہے۔ جس کے بعد آج خصوصی ٹرین سے گیا پہنچے ہیں۔ گھر واپس آکر بہت خوشی ہوئی۔وہیں اس ٹرین سے کچھ طلباء بھی پہنچے جو تلنگانہ پڑھتے تھے'۔ شاہجہاں نامی طالب علم نے بتایا کہ 'لاک ڈاون کی وجہ سے پریشانی ہوگئی تھی ، انکا کنبہ مالی طور سے کمزور ہے، اسلئے وہ گھر سے بھی مدد نہیں لے سکتے تھے۔ مجبوری میں وہ واپس آئے۔
واضح ہو کہ خصوصی ٹرین تقریبا 12 سو مزدوروں کے ساتھ گیا پہنچ گئی ہے۔ اس میں گیا، اورنگ آباد ، نوادہ ، جہان آباد ، ارول ، کیمور ، بکسر ، روہتاس ، بھوجپور سمیت متعدد اضلاع کے مزدور ہیں۔
تمام مزدوروں کی اسکریننگ کی جارہی ہے۔ تفتیش کے بعد بس کو ان کے ضلعی ہیڈ کوارٹر روانہ کیا جائے گا۔ جہاں وہ قرنطینہ کیے جائیں گے۔ ریلوے اسٹیشن پر وسیع پیمانے پر تیاریاں کی گئیں ہیں۔ آر پی ایف ، جی آر پی کے علاوہ محکمہ صحت کے لوگوں کو بھی تعینات کیا گیا ہے۔
