بہار: آسمانی بجلی گرنے سے 3 افراد ہلاک

گزشتہ ہفتے سے بہار میں مختلف مقامات پر آسمانی بجلی گرنے سے سیکڑوں لوگ ہلاک ہو چکے ہیں۔

بہار کے روہتاس اور بھوج پور اضلاع میں سنیچر کے روز آسمانی بجلی سے جھلس کر 3 افراد کی موت ہوگئی۔
ڈیہری آن سون سے موصولہ اطلاع کے مطابق روہتاس ضلع کے کرگہر تھانہ علاقہ میں ببنی پنچایت کے کروپ گاؤں کا رہنے والا نرنجن کمار سنگھ (35) مویشیوں کو چر رہا تھا کہ تیز بارش کے ساتھ آسمانی بجلی گری۔ اس حادثے میں نرنجن کی جھلس کر موقع پر ہی موت ہو گئی ۔
وہیں ایک دوسرے معاملے میں شیطانی گاؤں سے تعلق رکھنے والے ونود سنگھ کے کھیت میں ایک مزدور کام کر رہا تھا ،تبھی آسمانی بجلی گری۔ اس حادثے میں مزدورکی جھلس کر موت ہو گئی۔ متوفی کی شناخت جھارکھنڈ کے پلامو ضلع کے چھتر پور تھانہ علاقہ کے رودوا گاؤں سے تعلق رکھنے والے سنیل کمار (20) کے طور پرہوئی ہے۔ لاشوں کو پوسٹمارٹم کے لئے سہسرام صدر اسپتال بھیج دیا گیا ہے۔
آرا سے موصولہ اطلاعات کے مطابق ضلع بھوجپور کے ادونت نگر پولیس تھانہ علاقہ کے بیلور گاؤں میں آسمانی بجلی گرنے کی وجہ سے اکلو رائے (22) کی موت ہوگئی ہے۔