حکومت گجرات نے ریاست میں کورونا وائرس کے متاثرین کے تیزی سے بڑھنے کے پیش نظر آٹھ میٹرو شہروں کے تمام اسکولز میں آف لائن تعلیم کو 10 اپریل تک ملتوی رکھنے کا فیصلہ کیا ہے۔
گجرات کے وزیراعلیٰ وجے روپانی نے کورونا وائرس کے بڑھتے معاملات کے تناظر میں منعقد ایک میٹنگ میں یہ فیصلہ کیا۔
اس میں وزیرتعلیم بھوپیندر سنگھ چوڑاسما، ریاستی وزیر وبھاوریبین دوے، چیف سکریٹری انل مقیم، ایجوکیشن ڈپارٹمنٹ کی پرنسپل سکریٹری انجوشرما، سکریٹری ونود راوبھی موجود تھے۔
مسٹر چوڑاسما نے ان فیصلوں کی تفصیلی معلومات دیتے ہوئے بتایا کہ احتیاط کے طور پر آٹھ میٹرو یعنی احمدآباد، وڈودرا، راجکوٹ، سورت، بھاونگر، جام نگر، جوناگڑھ اور گاندھی نگرمیں تمام پرائمری (کلاس ایک سے آٹھویں)، سیکنڈری (کلاس نویں اور دسویں) اور ہائر سیکنڈری (کلاس 11 ویں اور بارہویں) اسکولز میں 19 مارچ سے براہ راست تعلیمی کام کاج بند کیاجائے گا۔
ان میٹروپولیٹن میونسپلٹی کے اسکولز میں آن لائن ایجوکیشن ہوم لرننگ مہیا کی جائے گی اور سیکنڈری اور ہائر سیکنڈری سکولز میں پہلا امتحان آن لائن لیا جائے گا۔
مسٹر چوڑاسما نے یہ بھی کہا کہ ان آٹھ میٹرو شہروں میں آف لائن تعلیم 10 اپریل تک بند رکھنے کا بھی فیصلہ کیا گیا ہے۔
آن لائن امتحان پرائمری اسکولز میں موجودہ نظام الاوقات کے مطابق لیا جائے گا۔
وزیر تعلیم نے کہا کہ ان آٹھ میٹروپولیٹن بلدیات کو چھوڑ کر دوسرے تمام علاقوں میں سیکنڈری اور ہائر سیکنڈری اسکولز میں رضاکارانہ طور پر آنے والے طلبا کے لیے براہ راست تعلیمی کام جاری رہے گا۔
