بالی ووڈ اداکارہ کنگنا رناوت کے خلاف جھارکھنڈ کی ایک عدالت میں غداری کی شکایت درج کرائی گئی ہے۔ آزادی اور گاندھی جی پر اپنے متنازع بیان کے بعد سماجی کارکن اظہار احمد عرف بہاری نے دھن آباد کی عدالت میں یہ شکایت درج کرائی ہے۔
شکایت میں کنگنا کے بیان کو ملک مخالف اور ہندوستان کی توہین کرنے والا بتایا گیا ہے۔ اس کے ساتھ ہی عدالت سے فلم اداکارہ کے خلاف ایف آئی آر درج کرنے کا حکم دینے کا اپیل کی گئی ہے۔ معاملے کی سماعت 20 نومبر کو ہوگی۔
سماجی کارکن اظہار احمد نے کہا کہ کنگنا کے بیان سے انہیں تکلیف پہنچی ہے کیونکہ یہ ایک ایسا بیان ہے جو ہندوستان کی توہین کرتا ہے۔
سب جانتے ہیں کہ ملک کب اور کیسے آزاد ہوا۔ انہوں نے بتایا کہ پولیس کی جانب سے ایف آئی آر درج کرنے سے انکار کے بعد وہ عدالت پہنچے ہیں۔ انہوں نے عدالت سے کنگنا کے خلاف ایف آئی آر درج کرنے کا مطالبہ کیا ہے۔
واضح رہے کہ کنگنا رناوت نے اپنے ایک بیان میں کہا تھا کہ '2014 سے پہلے ملک کو جو آزادی ملی وہ آزادی نہیں بھیک تھی۔ اس بیان کی ملک بھر میں مخالفت ہو رہی ہے۔
اب اسی بیان کو لے کر دھن آباد کورٹ میں شکایت درج کرائی گئی ہے۔ کنگنا کے اس بیان کے بعد دہلی کمیشن برائے خواتین کی چیئرپرسن سواتی مالیوال نے ملک کے عزت صدر جمہوریہ کو ایک خط لکھا ہے جس میں انہوں نے اداکارہ کنگنا رناوت کو دیا گیا پدم شری ایوارڈ واپس لینے کے لیے کہا ہے۔ اس کے ساتھ ہی ان کے خلاف غداری کا مقدمہ چلانے کی بھی اپیل کی گئی ہے۔
