عمر گوتم دہائیوں سے تبلیغ کا کام کر رہے ہیں لیکن کبھی کسی نے الزام نہیں لگایا

ای ٹی وی بھارت کے نمائندے نے پارلیمنٹ مسجد کے امام و خطیب مولانا محب اللہ ندوی سے بات کی جس میں انہوں نے بتایا کہ میں عمر گوتم صاحب کو ذاتی طور پر جانتا ہوں وہ خود مذہب اسلام کی تعلیمات سے متاثر ہو کر مسلمان ہوئے تھے اور وہ جو کچھ بھی کیا کرتے تھے وہ سب کچھ قانون کے دائرے میں رہ کر کیا کرتے تھے.

عمر گوتم نے جب اسلام قبول کیا تب ان کی عمر محض 21 برس تھی تب سے وہ تبلیغ کا کام سر انجام دے رہے ہیں اپنے 30 سالہ طویل عرصے کے دوران ان کے خلاف ایک بھی ایسی شکایت سامنے نہیں آئی جس میں ان کے خلاف یہ الزام لگا ہو کہ انہوں نے کسی کو جبراً یا لالچ دے کر اسلام قبول کروایا ہو.

انہوں نے کہا کہ صرف اس لیے کہ شیام پرتاپ سنگھ گوتم اپنی مرضی سے عمر گوتم ہو گئے اس لیے انہیں نشانہ بنایا گیا ہے تو میں سمجھتا ہوں کہ یہ کسی بھی مہذب سماج میں قابل قبول نہیں ہے.

مولانا محب اللہ ندوی نے کہا کہ اسلام زور زبردستی، لالچ، ڈرانے دھمکانے کی قطعی اجازت نہیں دیتا ہے، اور نہ ایسا ہو سکتا ہے. اگر کوئی شخص ڈر کے یا زور زبردستی یا پھر لالچ میں آکر اسلام مذہب اختیار کرتا ہے تو وہ مسلمان نہیں کہلائے گا بلکہ اگر کوئی شخص لالچ میں آکر شادی کرتا ہے تو وہ شادی بھی قابل قبول نہیں ہوگی.

انہوں نے مزید کہا کہ عمر گوتم کا پورا خاندان آج بھی اپنے مذہب پر قائم ہے اور ان کا تعلق سب سے ابھی بھی برقرار ہے ایسے میں زبردستی کرنا کیسے ممکن ہے۔ یہ تو دل کے سکون کا معاملہ ہے مجھے امید ہے کہ جلد ہی تمام الزامات غلط ثابت ہوں گے اور بہت جلد عمر گوتم ہمارے ساتھ ہوں گے.

واضح رہے کہ دارالحکومت دہلی کے جامعہ نگر علاقے سے یو پی اے ٹی ایس کے ذریعے دو مبلغ اسلام کو مبینہ مذہب تبدیل کرانے کے الزام میں گرفتار کیا گیا تھا جن کی شناخت عمر گوتم اور مفتی جہانگیر عالم قاسمی کے طور پر کی گئی تھی.

اتر پردیش پولیس نے ان کے خلاف پہلے تو دفعہ 420/120 بی/ 153 اے/153 بی/ 295 اے، 511 اور تبدیلیِ مذہب قانون 2020 کے تحت کارروائی کی تھی جس کے بعد انہیں جوڈیشیل کسٹڈی میں بھیج دیا گیا تھا تاہم بعد میں اترپردیش کے وزیر اعلیٰ ہوگی آدتیہ ناتھ کے حکم پر این ایس اے اور گینگسٹر ایکٹ کی دفعات بھی شامل کردی گئی ہیں.