اس موقع پر کل یعنی 29 اکتوبر 2019 سے ہی یونیورسٹی میں مختلف قسم کے علمی، ثقافتی اور سیمناروں کا انعقاد شروع ہو جائے گا جو تین دنوں تک جا ری رہے گا۔ اس میں بیت بازی، نکڑ ناٹک، تمثیلی مشاعرہ اور دیگر رنگا رنگ پروگرام طلباء کی جانب سے پیش کئے جائیں گے۔
آج اس سلسلے میں جامعہ ملیہ اسلامیہ کی وائس چانسلر پروفیسر نجمہ اختر نے دہلی کے گورنر انل بیجل سے ملاقات کی اور ان سے کانووکیشن میں شرکت کی اپیل کی۔ معزز گورنر نے اس بات کی یقین دہانی کرائی کہ وہ تقریب میں شریک ہوں گے۔ اس موقع پر دونوں کے مابین کافی دیر تک گفتگو بھی ہوئی جس میں محترمہ وائس چانسلر نے جامعہ میں ہونے والی متعدد سرگرمیوں کی بابت انھیں تفصیل سے بتایا۔
30 اکتوبر 2019 کی تقریب میں معزز صدر جمہوریہ ہند اور یونیورسٹی کے وزیٹر شری رام ناتھ کووند مہمان خصوصی ہوں گے اور کانووکیشن سے خطاب کریں گے۔ وزارت برائے ترقی انسانی وسائل، حکومت ہند کے وزیر شری رمیش پوکریال ’نشانک‘ مہمان ذی وقار ہوں گے۔
منی پور کے معزز گورنر اور جامعہ ملیہ اسلامیہ کی چانسلر ڈاکٹر نجمہ ہیپت اللہ اس تقریب کی صدارت کریں گی۔ اس موقع پر وائس چانسلر، جامعہ ملیہ اسلامیہ، پروفیسر نجمہ اختر بھی تقریب سے خطاب کریں گی۔
سال 2017 اور 2018 میں کامیاب ہونے والے 350 طلباء کو طلائی تمغہ جبکہ 10000 سے زیادہ طلباء کو ڈگری / ڈپلوما تفویض کئے جائیں گے۔ یہ تقریب یونیورسٹی کی اپنی 100 ویں سال میں داخل ہونے کے ایک دن بعد منعقد ہورہی ہے۔ 99 ویں یوم تاسیس کی تقریبات کے موقع پر بڑی تعداد میں علمی و ثقافتی سرگرمیاں انجام پائیں گی۔ بتا دیں کہ جامعہ ملیہ اسلامیہ کا قیام 29 اکتوبر 1920کو عمل میں آیا تھا۔
