کیجریوال کے اشارے پر شاہین باغ میں گولی چلی: پرویز ہاشمی

دہلی میں سیاست تیز ہو گئی ہے تمام سیاسی جماعتوں کے درمیان الزامات کا دور جاری ہے۔ اس بار انتخابات میں شاہین باغ کے احتجاج کو سب سے بڑا مدعا بنانے کی کوشش کی جا رہی ہے۔

بی جے پی مسلسل شاہین باغ کے احتجاجی مظاہرین کو ملک کے خلاف بتانے میں لگی ہوئی ہے جبکہ کانگریس کے مطابق شاہین باغ کے مظاہرین کو بھارت کے جمہوری نظام کا محافظ قرار دیا گیا ہے۔

اسی سے متعلق جب ای ٹی وی بھارت کے نمائندے نے اوکھلا حلقہ اسمبلی سے کانگریس کے امیدوار پرویز ہاشمی سے بات کی تو انہوں نے عام آدمی پارٹی کے اروند کیجریوال کو مظاہرین مخالف بتا دیا۔

پرویز ہاشمی نے ایک سوال کے جواب میں کہا کہ شاہین باغ میں جو گولی چلائی گئی وہ کیجریوال کے اشاروں پر چلی ہے۔ انہوں نے مزید کہا کہ وہ کیجریوال ہی ہیں، جو شاہین باغ میں بیٹھی ماں بیٹیوں پر حملہ کروا کر اس کا فائدہ اٹھا رہے ہیں۔

اس کے علاوہ انہوں نے بتایا کہ جس طرح سے اوکھلا کی عوام کے لیے انہوں نے کام کیا اور جو کام جہاں چھوڑا تھا وہیں سے اوکھلا اسمبلی میں فتح حاصل کرکے آگے بڑھائیں گے۔