دارالحکومت دہلی کے روہنی جیل کے ایک قیدی کے کورونا وائرس انفیکشن سے متاثر پائے جانے کے بعد تقریباً 20 قیدیوں اور جیل کے پانچ ملازمین کو قرنطینہ میں بھیجا گیا ہے۔
جیل کے ایک افسر نے بتایا کہ آنتوں سے متعلق بیماری کی وجہ سے ایک قیدی کو 10 مئی کو دین دیال اپادھیائے اسپتال میں داخل کرایا گیا تھا اور 11 مئی کو اس کا آپریشن ہوا تھا۔
آپریشن والے دن ہی اس کا کووِڈ19 ٹیسٹ کیا گیا تھا اور رپورٹ بدھ کو آئی ہے جس میں وہ متاثر پایا گیا ہے۔ اس کے بعد روہنی جیل میں اس کے ساتھ رہ رہے تقریباً 20 قیدیوں اور پانچ ملازمین کو قرنطینہ بھیج دیا گیا ہے۔
انہوں نے کہا کہ کورونا وائرس سے متاثر پائے جانے کے بعد قیدی کو لوک نائک جے پرکاش اسپتال میں داخل کرایا گیا ہے۔
یہ قیدی قتل اور لوٹ کے معاملے میں بند ہے۔ تقریباً ایک سال پہلے ہی اسے روہنی جیل لایا گیا ہے۔
افسر نے بتایا کہ اس کے رابطے میں آنے والے سبھی قیدیوں کی جلد کورونا جانچ کرائی جائےگی اور تب تک سبھی کو الگ تھلگ رکھا جائےگا۔
