'مودی کسان مخالف قوانین کو صحیح بتاکرسازش کررہے ہیں'

کانگریس پارٹی کے سابق صدر راہل گاندھی نے کہا کہ'مودی حکومت کسانوں کا استحصال کرکے سرمایہ داروں کی پرورش کررہی ہے اور کسان کی آمدنی دوگنا کرنے کا وعدہ فراموش کرکے اڈانی امبانی جیسے صنعت کاروں کی آمدنی میں اضافہ کرنے میں مصروف عمل ہے۔

راہل گاندھی نے کہا کہ' وعدہ تھا کسانوں کی آمدنی دوگنی کرنے کا، مودی حکومت نے آمدنی تو بڑھا دی لیکن اڈانی۔ امبانی کی۔ جو اب تک کالے زرعی قوانین کو صحیح بتا رہے ہیں، وہ کیا خاک کسانوں کے حق میں حل نکالیں گے۔

'مودی کسان مخالف قوانین کو صحیح بتاکرسازش کررہے ہیں'

اس موقع پر کانگریس پارٹی کے محکمہ مواصلات کے سربراہ رندیپ سنگھ سرجے والا نے نامہ نگاروں سے کہا کہ وزیراعظم نریندر مودی ریڈیو پر نشرہونے والے اپنے ماہانہ پروگرام 'من کی بات'میں آج زراعت مخالف قوانین کو صحیح بتاکر سازش کررہے ہیں۔ انہوں نے کہا کہ مودی حکومت کسانوں کے مفاد کے لیے ان تینوں قوانین کو فوری طورپر واپس لینے کا اعلان کرے۔

سرجے والا نے کہا کہ وزیراعظم کسان مخالف ان تین قوانین کو صحیح بتا کر ملک کے 62کروڑ کسانوں کی بات کو نظرانداز کرنے کی کوشش کرکے ان کے ساتھ ناانصافی کررہے ہیں۔ ان کا کہنا تھا کہ اگر ملک کا سربراہ ہی اس طرح بات کرے گا تو کسانوں کو صحیح انصاف کون دے گا۔

انہوں نے کہا کہ ہریانہ کے وزیراعلی منوہر لال کھٹر نے کسانوں کو دہشت گرد بتاکر ان کے خلاف جھوٹے معاملات درج کرائے ہیں۔ یہ کسانوں کے ساتھ ناانصافی ہے اور س کے لئے کھٹر کو عوامی طورپر معافی مانگنی چاہئے۔

ترجمان نے کہا کہ حکومت اگر سچ مچ کسانوں سے بات کرنا چاہتی ہے تو خود مودی کو ان کے مسائل سننے چاہئیں اور انہیں یقین دلانا چاہئے کہ وہ اپنی تحریک ختم کردیں۔