ریاست اتر پردیش کے گوتم بدھ نگر کے نوئیڈا میں ضلع پنچایت صدر امت چودھری کی رہائش گاہ پر ایک شاندار استقبالیہ کے بعد پیرا ایتھلیٹ پروین کمار کے اعزاز میں ان کے گاؤں گووند گڑھ میں ڈھول اور تاشے کے ساتھ شاندار استقبال کیا گیا۔
علاقائی رکن پارلیمنٹ اور سابق وزیر ڈاکٹر مہیش شرما نے پروین کمار کے گاؤں پہنچ کر انہیں اعزاز سے نوازا۔ رکن پارلیمنٹ نے کہا کہ ’’نوئیڈا کے اس بیٹے نے پوری دنیا میں ہمارا سر فخر سے اونچا کیا ہے، یہ ہم سب کے لیے فخر اور اعزاز کی بات ہے۔‘‘
ضلع پنچایت صدر امت چودھری نے کہا کہ ’’پروین کمار کے نام پر جیور میں سڑک اور کھیلوں کا اسٹیڈیم بھی تعمیر کیا جائے گا۔‘‘
پروین کے گاؤں گووند گڑھ میں منعقدہ اعزازی تقریب میں پولیس کمشنر الوک سنگھ نے کہا کہ ’’پروین کی کامیابی ہمارے دیہی پس منظر کی کامیابی ہے۔ اس سے نوجوانوں کو ترغیب لینی چاہیے۔‘‘
مزید پڑھیں: دہلی: چاقو سے گود کر نوجوان کا قتل
پولیس کمشنر نے مزید کہا کہ ’’پروین کمار جیسے نوجوان نئی نسل کے لیے رول ماڈل ہیں، جنہوں نے پورے نوئیڈا، اترپردیش اور ملک کا نام دنیا میں روشن کیا ہے۔‘‘
یہ بھی پڑھیں: دہلی میں کورونا وائرس کے 36 نئے متاثرین
علاقے کے رکن اسمبلی دھریندر سنگھ نے کہا: ’’کم وسائل اور مالی حالت ٹھیک نہ ہونے کے باوجود پروین کمار کی کامیابی انہیں عظیم بناتی ہے۔‘‘
واضح رہے کہ پروین کمار نے پیرالمپک کے ہائی جمپ مقابلے میں سلور میڈل حاصل کیا ہے۔
