قومی دارالحکومت دہلی میں ایک رنگا رنگ پروگرام کے دوران مشہور گلوکار پنکج جیسوانی کے لکھے ہوئے بھجن، گیت، غزل اور نظموں پر مشتمل ’’پنکج جیسوانی کی قلم سے‘‘ نامی کتاب کا اجراء کیا گیا۔
کتاب کی رسم رونمائی کے دوران پنکج جیسوانی نے کہا کہ اب تک انہیں ملک سمیت بیرون ممالک میں 800 ایوارڈز حاصل ہوئے ہیں اور وہ تقریباً 70-80 فلموں، سیریلز، شارٹ فلمز اور البمز میں موسیقی دے چکے ہیں۔ اس کے علاوہ 13،000 اسٹیج شو بھی کرچکے ہیں۔
اپنی کتاب کے بارے میں انہوں نے کہا کہ ’’میں نے جو نظمیں، غزلیں لکھی ہیں وہ میرے دل کے بہت قریب ہیں۔‘‘
جیسوانی نے مزید کہا کہ وہ اردو زبان و ادب کے ماہر نہیں ہے، لیکن پھر بھی انہوں نے عمدہ شاعری کرنے کی کوشش کی ہے، جس کا البم بھی آنے والے وقت میں جاری کیا جائے گا۔
مزید پڑھیں: دہلی: سوشل میڈیا پر تصویر وائرل ہونے کے بعد صفدر جنگ مقبرہ کی صفائی
کتاب کی رسم رونمائی کے دوران ہدایت کار سنیل پراشر، شاعر معصوم غازی آبادی، شوبھا وجیندر سمیت دیگر معززین موجود تھے۔
واضح رہے کہ پنکج جیسوانی کا سریلا سفر گزشتہ تین دہائیوں سے جاری ہے۔
