قومی دارالحکومت دہلی سے متصل صنعتی شہر نوئیڈا میں پولیس کچھ دنوں کی راحت کے بعد دوبارہ انکاؤنٹر موڈ میں آ گئی ہے۔
آج سیکٹر 24 سے سیکٹر 54 چوکی کی جانب جانے والی شاہراہ پر بدمعاشوں سے ہوئے تصادم میں بپن بالمکی نامی بدمعاش گولی لگنے سے زخمی ہوا اور اسے گرفتار کر لیا گیا۔
بپن بالمکی کو زخمی حالت میں نزدیکی ہسپتال میں داخل کرایا گیا جبکہ بپن بالمکی کے دیگر بدمعاش ساتھی اندھیرے کا فائدہ اٹھا کر موقع سے فرار ہوگئے۔
واضح رہے کہ 24 گھنٹے میں پولیس اور بدمعاشوں کے درمیان یہ دوسری مرتبہ تصادم ہوا ہے۔
بتایا جارہا ہے کہ بپن مورنا گاؤں سیکٹر 35 کا رہنے والا ہے جو گزشتہ دنوں بیٹا-2 تھانہ میں چین لوٹ کی واردات کو اسی نے انجام دیا تھا۔
وہیں دوسری جانب نو نومبر کو سیکٹر 57 سے لوٹی گئی پلسر جس پر جعلی نمبر پلیٹ لگی تھی برآمد ہوئی ہے، اور اس کے پاس سے ایک لیپ ٹاپ، دو بیگ اور غیر قانونی اسلحہ بھی برآمد ہوئے ہیں۔
ڈی سی پی رن وجے سنگھ نے بتایا کہ زخمی بدمعاش بپن لوٹ اور ڈکیتی کے درجنوں واقعات میں ملوث رہا ہے اور اس پر مختلف دفعات میں مقدمے بھی درج ہیں۔
